इंग्लंड संघाचा चार कसोटी, पाच टी२० आणि तीन एकदिवसीय सामन्यांचा भारत दौरा ५ फेब्रुवारीपासून सुरू होणार आहे. सुरुवातीचे दोन कसोटी सामने चेन्नई येथील चेपॉक स्टेडियमवर खेळले जातील. कोरोनामूळे ठप्प झालेले भारतातील आंतरराष्ट्रीय क्रिकेट या मालिकेपासून सुरु होईल.
याशिवाय चेन्नई कसोटी सामना आणखी एका कारणामुळे लक्षात राहील. आपण भारतातील क्रिकेट परंपरा पाहिली तर, दीर्घ अनुभवानंतरच एका क्युरेटरला आंतरराष्ट्रीय खेळपट्टी बनविण्याची संधी मिळते. मात्र, तमिळनाडू क्रिकेट संघटनेने युवा क्युरेटर व्ही रमेशकुमार यांना इंग्लंडविरुद्धच्या कसोटींसाठी खेळपट्टी बनवण्याची जबाबदारी दिली आहे. विशेष म्हणजे रमेशकुमार यांनी यापूर्वी प्रथमश्रेणी सामन्यांची देखील खेळपट्टी बनवली नाही.
कापड व्यापारी आहेत रमेशकुमार
तामिळनाडूमधील तिरुपूर हे शहर वस्त्रोद्योगासाठी ओळखले जाते. तेथे रमेश स्वत: च्या दोन कंपन्या चालवितात. त्यांच्या मालाची युरोपला निर्यात केली जाते. सुमारे ७०० लोक त्यांच्या कंपन्यांत नोकरी करतात. या व्यवसायात रमेशकुमार यांना त्यांची सनदी लेखापाल पत्नी देखील मदत करते.
आंतरराष्ट्रीय व्यवसायात एमबीए करणाऱ्या ४२ वर्षीय रमेश यांनी मानसशास्त्रात पदवी मिळविली आहे. जानेवारीच्या पहिल्या आठवड्यात जेव्हा रमेशकुमार यांना ही ऑफर मिळाली तेव्हा ते स्वतःहून निर्णय घेऊ शकले नाहीत, म्हणून त्यांनी आपल्या कुटूंबाचा सल्ला घेतला. याव्यतिरिक्त, एक मोठा प्रश्न देखील होता की, या दरम्यान इतका मोठा व्यवसाय कोण सांभाळेल?
इतकी कहाणी वाचल्यानंतर लोकांच्या मनात असा विचार येईल की, एखाद्या यशस्वी उद्योगपतीचा क्रिकेटबरोबर काय संबंध आहे? ज्यामुळे त्याला इतकी मोठी जबाबदारी देण्यात आली.
अपघाताने बनले क्युरेटर
महाविद्यालयीन काळात ११० मीटर अडथळ्याच्या शर्यतीमध्ये राष्ट्रीय पदक जिंकणार्या रमेशकुमार यांनी १९९६ मध्ये तामिळनाडूचे प्रतिनिधित्व केले होते. सुमारे १० वर्षांपूर्वी रमेशकुमार यांनी तिरुपुरमध्ये क्रिकेट स्कूल सुरु केले. नवीन मुलांना अधिक चांगले खेळाडू बनविण्यासाठी त्यांनी जमीन विकत घेतली आणि तेथे उत्कृष्ट मैदान बांधले. जिथे एक टर्फ पिच आणि १२ सराव खेळपट्ट्या बनवलेल्या आहेत.
मैदानाची काळजी घेणे सोपे जावे म्हणून, त्यांनी ही कला स्वत: शिकली. तामिळनाडू क्रिकेट असोसिएशनने त्यांना बीसीसीआयच्या एका कोर्सची माहिती दिली, ज्यामध्ये खेळपट्टी बनविणे शिकवले जाते. २०१९ मध्ये बीसीसीआयच्या ग्राउंड-पिच समितीचे अध्यक्ष म्हणून निवृत्त झालेले देशाचे सुप्रसिद्ध पीच क्युरेटर आणि बिहारचे माजी क्रिकेटपटू दलजित सिंग यांनी हा अभ्यासक्रम सुरू केला होता.
इंग्लिश परंपरेची असेल खेळपट्टी
जुलै २०१८ मध्ये कोर्स उत्तीर्ण झाल्यानंतर रमेशकुमार यांनी कोयंबटूर, तिरुपूर आणि सालेममधील अंडर -१६, अंडर-१९ आणि अंडर-२३ बीसीसीआय स्पर्धांसाठी अनेक खेळपट्ट्यांची निर्मिती केली. त्यानंतर त्यांनी आयपीएलवेळी देशातील अनेक ज्येष्ठ क्युरेटर्ससमवेत वेळही घालवला. आयपीएल २०१९ दरम्यान टीएनसीएने त्यांना चेपॉकची खेळपट्टी बनवण्यासाठी आमंत्रित केले होते. परंतु, व्यवसायिक कारणांमुळे रमेशकुमार ती जबाबदारी घेऊ शकले नाहीत. खेळपट्टी बनविण्यासाठी रमेशकुमार यांच्याकडे २६ कर्मचाऱ्यांची मोठी फौज आहे.
बीसीसीआयने खेळपट्टी समितीच्या तपोष चटर्जी यांना रमेशकुमार यांच्या मदतीसाठी पाठवले आहे. चेन्नई येथील दोन कसोटी सामन्यांसाठी दोन वेगवेगळ्या खेळपट्ट्यांवर काम सुरु आहे. एक खेळपट्टी पूर्ण लाल मातीची तर दुसरी खेळपट्टी मिश्रित मातीची आहे. वानखेडे स्टेडियमपेक्षा चेपॉकची लाल मातीची खेळपट्टी वेगळी असेल जिथे प्रत्येक गोलंदाजाला अतिरिक्त उंची लाभेल. चेन्नईतील लाल माती एकदा चेपल्यानंतर सपाट होईल. दुसर्या खेळपट्टीचा पाया तीन इंच स्थानिक लाल मातीचा असेल व वरचा थर काळ्या मातीचा असेल. सामना कोणत्या खेळपट्टीवर खेळवायचा हा निर्णय अंतिम क्षणी होईल.
महत्वाच्या बातम्या:
भारताविरुद्ध शंभरावा कसोटी सामना खेळत या दिग्गजांनी गाजवले मैदान
डेक्कन चार्जर्ससाठी खेळलेला दिग्गज उतरणार आयपीएल लिलावात, आंतरराष्ट्रीय पुनरागमनाची लागली आशा