आयपीएल 2026 मधील 64व्या सामन्यात राजस्थान रॉयल्सने लखनऊ सुपर जायंट्सचा 7 विकेट्सने पराभव करत प्लेऑफच्या आशा कायम ठेवल्या. जयपूरच्या सवाई मानसिंह स्टेडियमवर झालेल्या या सामन्यात राजस्थानचा 15 वर्षीय युवा फलंदाज वैभव सूर्यवंशी पुन्हा एकदा चर्चेत आला. सूर्यवंशीने अवघ्या 38 चेंडूंमध्ये 93 धावांची तुफानी खेळी करत 10 षटकार आणि 7 चौकार ठोकले.
या सामन्यानंतर वैभव सूर्यवंशीच्या नावावर आता आयपीएल 2026 मध्ये एकूण 53 षटकार झाले आहेत. त्यामुळे एका आयपीएल हंगामात सर्वाधिक षटकार मारण्याच्या ख्रिस गेलच्या ऐतिहासिक विक्रमापासून तो आता फक्त काही पावले दूर आहे.
एका आयपीएल हंगामात सर्वाधिक षटकार मारण्याचा विक्रम सध्या ख्रिस गेलच्या नावावर आहे. गेलने 2012 मध्ये रॉयल चॅलेंजर्स बेंगळुरूकडून खेळताना 15 डावांत तब्बल 59 षटकार ठोकले होते.
दुसरीकडे, वैभव सूर्यवंशीने फक्त 13 डावांतच 53 षटकार पूर्ण केले आहेत. त्यामुळे पुढील सामन्यात त्याला हा विक्रम मोडण्यासाठी केवळ 7 षटकारांची आवश्यकता आहे, तर 6 षटकार मारताच तो गेलच्या विक्रमाची बरोबरी करेल. सध्याचा त्याचा फॉर्म पाहता हा ऐतिहासिक विक्रम धोक्यात आला आहे.
राजस्थान रॉयल्सने 13 सामन्यांत 7 विजय आणि 6 पराभवांसह 14 गुण मिळवले असून संघ गुणतालिकेत चौथ्या स्थानावर पोहोचला आहे. संघाचा नेट रनरेटही सकारात्मक आहे. राजस्थानचा पुढील सामना मुंबई इंडियन्सविरुद्ध होणार आहे.
24 मे रोजी होणारा हा सामना राजस्थानने जिंकल्यास संघ थेट प्लेऑफमध्ये प्रवेश करेल. अशावेळी वैभव सूर्यवंशीला आणखी सामने खेळण्याची संधी मिळेल आणि ख्रिस गेलचा विक्रम मोडण्याची शक्यता अधिक वाढेल.
याआधी एका हंगामात सर्वाधिक षटकारांच्या विक्रमाच्या सर्वात जवळ आंद्रे रसेल पोहोचला होता. मात्र तो 52 षटकारांवरच थांबला. आता वैभव सूर्यवंशीकडे इतिहास रचण्याची सुवर्णसंधी आहे.
