‘विराट अन् अश्विन चांगले पंच बनू शकतात’, असे का म्हणाले ऑस्ट्रेलियाचे माजी दिग्गज अंपायर?

अनेकांना वाटते की, पंचाचे काम हे एक बोरिंग काम आहे आणि यामध्ये पाहिजे तेवढा पैसा देखील मिळत नाही. मात्र, सायमन टॉफेल (Simon Taufel) यांना मात्र असे वाटत नाही. त्यांच्या मते भारतीय दिग्गज विराट कोहली (Virat Kohli) आणि रविचंद्रन अश्विन (Ravichandran Ashwin) यांच्याकडे पंच बनण्यासाठी आवश्यक गुणवत्ता आहे.

एका वृत्तसंस्थेला दिलेल्या मुलाखतीत ते म्हणाले की, “पंचाचे काम आजिबात कंटाळावाणे नाहीये. जोपर्यंत तुम्ही खूप कोरड्या जागेवर म्हणजेच कराची किंवा अशाचप्रकारच्या इतर कोणत्या ठिकाणी पंचाचे काम करत असाल, खेळपट्टीवर काहीच हालचाल होत नसेल, तेव्हा हे काम थोडे कंटाळवाणे होते. तुम्हाला माहिती आहे पंचाचे काम खूप आव्हानात्मक आहे. लोकं म्हणतात तुम्ही एवढा वेळ कसे काय लक्ष केंद्रित करता? तर उत्तर हे आहे की, आम्ही फक्त स्टंप्सकडे पाहत असतो. या कामात खूप सन्मान आणि पैसा आहे.”

टॉफेल यांनी पुढे कोणकोणते खेळाडू पंच बनू शकतात याविषयी खुलासा केला. ते म्हणाले की, “जर तुम्हाला पंच बनायचे आहे, तर त्यासाठी व्यक्तिमत्व आणि इच्छा असावी लागते. मी मॉर्ने मॉर्केलसोबत बोललो होतो आणि तो हे काम करण्यासाठी इच्छुक होता, पण हे प्रत्येकाला जमणारे काम नाहीये. मी विरेंद्र सेहवाग, किंवा विराट कोहली आणि रविचंद्रन अश्विनला पंचाच्या रूपात पाहू इच्छितो. या सर्वांना निमयांची चांगली जाण आहे.”