कार्तिकच्या अंगात संचारली ‘कॅरेबियन पॉवर!’ विंडीज संघाविरुद्ध ‘एवढ्या’ स्ट्राईक रेटने केल्या धावा

वेस्ट इंडीजविरुद्धची एकदिवसीय मालिका जिंकल्यानंतर भारतीय संघाने टी-२० मालिकेतील पहिला सामना देखील नावावर केला. वेस्ट इंडीजविरुद्धच्या टी-२० मालिकेतील पहिला सामना शुक्रवारी (२९ जुलै) तारुबामध्ये खेळला गेला. भारताने या सामन्यात ६८ धावांनी विजय मिळवला. भारताने या सामन्यात प्रथम फलंदाजी केली असून दिनेश कार्तिक याच्या जबरदस्त खेळीमुळे संघाने मोठी धावसंख्या उभी केली. 

भारतीय संघाने या सामन्यात शेवटच्या ४ षटकांमध्ये ५२ धावा केल्यामुळे संघाला विजय मिळू शकला. दिनेश कार्तिक (Dinesh Karthik) याने दिलेले योगदान सर्वात महत्वपूर्ण ठरले. कार्तिकने अवघ्या १९ धावांमध्ये २१६ च्या स्ट्राईक रेटने ४१ धावा केल्या. या धावा त्याने ४ चौकार आणि २ षटकारांच्या मदतीने केल्या. सातव्या विकेटसाठी त्याने रविचंद्रन अश्विनच्या साधीने महत्वाची भागीदारी देखील केली.

भारताच्या डावातील १९ व्या षटकात जेसन होल्डर गोलंदाजीसाठी आला होता. होल्डरच्या या षटाकातील पाचव्या चेंडूवर कार्तिकने खनखनीत षटकार मारला. त्यानंतर षटकातील शेवटच्या चेंडूवर देखील त्याने चौकार ठोकला. शेवटचे षटक वेगवान गोलंदाज ओबेड मेकॉय घेऊन आला होता. या षटकातील तिसऱ्या चेंडूवर कार्तिकने पुन्हा एकदा षटकार मारला. त्यानंतर चौथ्या आणि शेवटच्या चेंडूवर चौकार मारून कार्तिकनेच डावाचा शेवट केला. अश्विनने खेळलेल्या १० चेंडूत नाबाद १३ धावांचे योगदान दिले.