एशिया कप २०१८: टीम इंडिया सातव्यांदा विजेतेपद मिळवण्यास सज्ज

दुबई। आज (28 सप्टेंबर) एशिया कप 2018 स्पर्धेचा अंतिम सामना भारत विरुद्ध बांगलादेश संघात दुबई आंतरराष्ट्रीय क्रिकेट स्टेडियमवर होणार आहे.

या सामन्यात विजय मिळवून भारतीय संघ सातव्यांदा एशिया कपचे विजेतेपद मिळवण्यासाठी उत्सुक आहे तर बांगलादेशही पहिल्यांदा एशिया कपचे विजेते होण्यासाठी प्रयत्न करतील.

या दोन संघात यावर्षीचा हा दुसरा अंतिम सामना आहे. याआधी हे दोन संघ यावर्षी श्रीलंकेत पार पडलेल्या निदाहास ट्रॉफीच्या अंतिम सामन्यात आमने सामने आले होते. या सामन्यात शेवटच्या चेंडूवर भारताला 5 धावांची गरज असताना षटकार मारत दिनेश कार्तिकने रोमहर्षक विजय मिळवून दिला होता.

एशिया कपच्या अंतिम सामन्याआधी भारताने या स्पर्धेतील एकही सामन्यात पराभव स्विकारलेला नाही. त्यांनी सुपर फोरमध्ये पाकिस्तान आणि बांगलादेश विरुद्ध विजय मिळवला आहे. तर अफगाणिस्तान विरुद्धचा सामना बरोबरीत सुटला आहे. तसेच त्याआधी साखळी फेरीतील पाकिस्तान आणि हाँगकाँग विरुद्धचे सामनेही जिंकले आहेत.

तसेच बांगलादेशचा मात्र अंतिम सामन्यापर्यंत अडखळत प्रवास झाला आहे. त्यांनी साखळी फेरीत अफगाणिस्तान विरुद्ध पराभव तर श्रीलंकेविरुद्ध विजय मिळवत सुपर फोरमध्ये प्रवेश केला होता.

सुपर फोरमध्ये त्यांना भारताविरुद्ध पराभव स्विकारावा लागला, तर त्यांनी अफगाणिस्थानविरुद्ध रोमांचकारी झालेल्या सामन्यात शेवटच्या चेंडूवर विजय मिळवला.

तसेच पाकिस्तान विरुद्ध अंतिम सामन्यातील प्रवेशासाठी झालेल्या निर्णायक लढतीत 37 धावांनी विजय मिळवत अंतिम सामन्यात धडक मारली.

भारतीय संघाने या अंतिम सामन्याआधी सुपर फोरमध्ये झालेल्या अफगाणिस्तानविरुद्धच्या सामन्यात महत्त्वाच्या 5 खेळाडूंना विश्रांती दिली होती. यात कर्णधार रोहित शर्मा, शिखर धवन, भुवनेश्वर कुमार, जसप्रीत बुमराह आणि युजवेंद्र चहल यांचा समावेश होता.

पण आता अंतिम सामन्यासाठी हे पाचही खेळाडू पुन्हा 11 जणांच्या संघात खेळतील. त्याशिवाय केदार जाधव, दिनेश कार्तिक, अंबाती रायडू आणि एमएस धोनी यांना मधल्या फळीत खेळण्याची संधी मिळू शकते.

त्याचबरोबर भारतीय संघव्यवस्थापनासमोर अफगाणिस्तान विरुद्ध अर्धशतक केलेला केएल राहुलचा आणि मनिष पांडेचाही पर्याय आहे.

तसेच अष्टपैलू खेळाडू म्हणून रविंद्र जडेजाला संधी दिली जाईल. वेगवान गोलंदाजीची जबाबदारी ही बुमराह आणि भुवनेश्वरवर असेल. तर फिरकी गोलंदाजीसाठी कुलदीप यादव आणि युजवेंद्र चहल संघात असतील. त्यांना जडेजाची साथ मिळेल.

त्याचबरोबर भारताकडे सिद्धार्थ कौल आणि दिपक चहर असे पर्याय देखील आहेत. पण त्यांना संधी मिळणे अवघड आहे.

बांगलादेशला मात्र अंतिम सामन्याआधी मोठा धक्का बसला आहे. त्यांचा अष्टपैलू खेळाडू शाकिब अल हसनला पाकिस्तान विरुद्धच्या सामन्यादरम्यान दुखापत झाली आहे. त्यामुळे तो अंतिम सामन्यासाठी उपलब्ध नसेल.

तसेच या स्पर्धेतील पहिल्याच सामन्यात त्यांचा सलामीवीर फलंदाज तमीम इक्बाल दुखापतग्रस्त झाल्याने उर्वरित स्पर्धेस मुकला आहे.

त्यामुळे या दोन महत्त्वाच्या खेळाडूंशिवाय बांगलादेशला भारताविरुद्ध अंतिम सामना खेळावे लागणार आहे. असे असलेे तरी मुस्तफिझुर रेहमान, कर्णधार मश्रफे मोर्तझा, मुशफिकुर रहिम हे खेळाडू भारतासाठी डोकेदुखी ठरु शकतात.

त्याचबरोबर बांगलादेश हे 2012 आणि 2016 च्या एशिया कपचे उपविजेते आहेत हे विसरुनही चालणार नाही.

भारत आणि बांगलादेश आत्तापर्यंत 34 वेळा वनडेत आमने सामने आले असून भारताने यात 28 वेळा बाजी मारली आहे, तर बांगलादेशने 5 वेळा विजय मिळवला आहे. तसेच 1 सामना अनिर्णित राहिला आहे.

याबरोबरच एशिया कपस्पर्धेत हो दोन संघ आत्तापर्यंत 11 वेळा एकमेकांविरुद्ध खेळले आहेत. यात भारताने 10 वेळा तर बांगलादेशने 1 वेळा विजय मिळवला आहे.

भारत विरुद्ध बांगलादेश यांच्यातील अंतिम सामन्याबद्दल सर्वकाही-

भारत विरुद्ध बांगलादेश कधी होणार आहे एशिया कपचा अंतिम सामना?

भारत विरुद्ध बांगलादेश यांच्यातील एशिया कपचा अंतिम सामना 28 सप्टेंबर 2018 ला होणार आहे.

कोठे होईल भारत विरुद्ध बांगलादेश एशिया कपचा अंतिम सामना?

भारत विरुद्ध बांगलादेश एशिया कपमधील अंतिम सामना दुबई येथील दुबई आंतरराष्ट्रीय क्रिकेट स्टेडियमवर होणार आहे.

किती वाजता सुरु होईल भारत विरुद्ध बांगलादेश एशिया कपचा अंतिम सामना?

भारतीय प्रमाण वेळेनुसार संध्याकाळी 5.00 वाजता भारत विरुद्ध बांगलादेश यांच्यातील एशिया कपच्या अंतिम सामन्याला सुरुवात होईल. तर संध्याकाळी 4.30 वाजता नाणेफेक होईल.

भारत विरुद्ध बांगलादेश यांच्यातील एशिया कपचा अंतिम सामना कोणत्या चॅनेलवर पाहता येईल?

स्टार स्पोर्ट्स 1,  स्टार स्पोर्ट्स 1 एचडी, स्टार स्पोर्ट्स 1 सिलेक्ट, स्टार स्पोर्ट्स 1 सिलेक्ट एचडी, स्टार स्पोर्ट्स हिंदी 1 आणि स्टार स्पोर्ट्स हिंदी 1 एचडी  या चॅनेल्सवरुन प्रेक्षकांना भारत विरुद्ध बांगलादेश यांच्यातील एशिया कपचा अंतिम सामना पाहता येणार आहे.

भारत विरुद्ध बांगलादेश यांच्यातील एशिया कपचा अंतिम सामना ऑनलाइन कसा पाहता येईल?

hotstar.com या वेबसाईटवर भारत विरुद्ध बांगलादेश एशिया कपचा अंतिम सामना ऑनलाइन पाहता येईल.

यातून निवडला जाईल 11 जणांचा संघ:

भारत: रोहित शर्मा (कर्णधार), शिखर धवन(उपकर्णधार), केएल राहुल, अंबाती रायडू, मनीष पांडे, केदार जाधव, एमएस धोनी (यष्टीरक्षक), दिनेश कार्तिक, कुलदीप यादव, युझवेंद्र चहल, भुवनेश्वर कुमार, जसप्रीत बुमराह, खलील अहमद, सिद्धार्थ कौल, दिपक चहर, रविंद्र जडेजा.

बांगलादेश: मशर्रफ मोर्ताझा (कर्णधार), मोहम्मद मिथुन, लिटन दास, मुशफिकुर रहिम, अरिफुल हक, महमदुल्ला, मोसद्दीक हुसेन, मेहदी हसन, नाझमुल इस्लाम, रुबेल हुसेन, मुस्तफिजुर रहमान, अबू हैदर रोनी, नाझमुल हुसेन शान्तो, मोमिनुल हक.

महत्त्वाच्या बातम्या-

–मराठमोळा रिशांक देवाडीगा करणार यूपी योद्धाचे नेतृत्व

–एशिया कपमधील खराब कामगिरीचा मला बळीचा बकरा बनवले गेले

–कोरिया ओपनच्या उपउपांत्यपुर्व सायनाचा धडाक्यात प्रवेश