खेळाडूंच्या कुटुंबियांसाठी वेळ मर्यादा कमी करण्याच्या बीसीसीआयच्या नियमावर विराट कोहलीने अलीकडेच आपले मत मांडले आहे. त्याला असे वाटते की, एकटे आणि नैराश्यात राहण्यापेक्षा मैदानावरील कठीण आणि तणावपूर्ण दिवसांना तोंड देण्यासाठी तो नेहमीच त्याच्या कुटुंबातील सदस्यांना त्याच्याभोवती असायला पसंत करेल. भारतीय क्रिकेट नियामक मंडळाने जारी केलेल्या सूचनांमध्ये, खेळाडूंनी त्यांच्या कुटुंबियांसोबत 45 दिवसांपेक्षा जास्त कालावधीच्या दौऱ्यावर घालवलेला वेळ 14 दिवसांपर्यंत मर्यादित करण्यात आला होता. मात्र, आता बीसीसीआय कुटुंबासोबत राहण्याच्या धोरणात बदल करण्याचा विचार करू शकते.
जर भारतीय खेळाडूंना त्यांच्या कुटुंबियांना आणि जवळच्या लोकांना दीर्घकाळ दौऱ्यावर सोबत ठेवायचे असेल, तर बीसीसीआय त्यांच्या कुटुंबियांच्या राहण्याच्या धोरणात बदल करण्याचा विचार करू शकते. बीसीसीआयच्या एका उच्चपदस्थ सूत्राने सांगितले की, “जर खेळाडूंना त्यांच्या कुटुंबियांना दौऱ्यावर जास्त काळ राहायचे असेल तर ते परवानगीसाठी अर्ज करू शकतात. त्यानुसार बीसीसीआय निर्णय घेईल.”
ऑस्ट्रेलियाविरुद्धच्या कसोटी मालिकेत भारताचा 1 – 3 असा पराभव झाल्यानंतर, भारतीय क्रिकेट नियामक मंडळाने 45 दिवसांपेक्षा जास्त कालावधीच्या दौऱ्यावर खेळाडूंना त्यांच्या कुटुंबियांसोबत घालवता येणारा वेळ 14 दिवसांपर्यंत मर्यादित करण्याचे निर्देश जारी केले होते. यानुसार, खेळाडूंच्या पत्नी, मुले किंवा महिला मैत्रिणी त्यांच्यासोबत लहान दौऱ्यांवर जास्तीत जास्त एक आठवडा राहू शकतात.
“कुटुंबाची भूमिका लोकांना समजावून सांगणे खूप कठीण आहे,” असे कोहलीने शनिवारी (15 मार्च 2025) झालेल्या आरसीबीच्या ‘इनोव्हेशन लॅब’ परिषदेत सांगितले. तो म्हणाला, जेव्हा तुम्ही तणावपूर्ण परिस्थितीत असता तेव्हा तुमच्या कुटुंबाकडे परत येणे किती महत्त्वाचे आहे. मला वाटत नाही की लोकांना याचे महत्त्व समजले आहे.
कोहली म्हणाला की, कुटुंबासोबत राहिल्याने खेळाडूला मैदानावरील निराशेतून लवकर सावरण्यास मदत होते. तो म्हणाला, “मला माझ्या खोलीत जाऊन एकटे बसून दुःखी व्हायचे नाहीये. मला सामान्य राहायचे आहे. तरच तुम्ही तुमचा खेळ जबाबदारी म्हणून घेऊ शकाल.
