आयसीसी टी-२० विश्वचषक २०२१ स्पर्धेला जोरदार प्रारंभ झाला आहे. या स्पर्धेतील पात्रता फेरीतील सामने संपले आहेत. यानंतर आता सुपर-१२ फेरीला सुरुवात झाली आहे. शनिवारी (२४ ऑक्टोबर) या स्पर्धेत वेस्ट इंडिज आणि इंग्लंड हे दोन्ही बलाढ्य संघ आमने सामने होते. या सामन्यात वेस्ट इंडिज संघाला ६ गडी राखून पराभवाचा सामना करावा लागला. दरम्यान वेस्ट इंडिज संघाचा विस्फोटक फलंदाज ख्रिस गेल याने मोठा विक्रम आपल्या नावावर केला आहे.
वेस्ट इंडिज संघाचा दिग्गज फलंदाज ख्रिस गेल याने आंतरराष्ट्रीय क्रिकेटमध्ये अनेक मोठ मोठे विक्रम आपल्या नावावर केले आहेत. मोठमोठे षटकार असो, की सर्वात जलद शतक, या सर्व बाबतीत ख्रिस गेल अव्वल स्थानी आहे. दरम्यान इंग्लंड संघाविरुद्ध झालेल्या टी-२० सामन्यात देखील त्याने शतक पूर्ण केले आहे. परंतु यावेळी फलंदाजी करताना नव्हे तर, क्षेत्ररक्षण करताना त्याने हा कारनामा केला आहे. तो या सामन्यात टी-२० क्रिकेटमध्ये १०० झेल टिपणारा खेळाडू ठरला आहे.
ख्रिस गेलने रवी रामपॉलच्या गोलंदाजीवर हा कारनामा केला. चौथे षटक टाकण्यासाठी आलेल्या रवी रामपॉलने पहिलाच चेंडू स्लोवर चेंडू टाकला होता, ज्यावर जेसन रॉयने मिड विकेटच्या दिशेने फटका खेळण्याचा प्रयत्न केला. परंतु हा प्रयत्न फसला आणि चेंडू ख्रिस गेलच्या हातात गेला. यासह ख्रिस गेलच्या नावे टी-२० क्रिकेटमध्ये १०० झेल टिपण्याच्या पराक्रमाची नोंद झाली आहे.
यासह तो टी२० क्रिकेटमधील १०० झेल टिपणाऱ्या खेळाडूंच्या यादीत सहभागी झाला आहे. या विक्रमाच्या यादीत कायरन पोलार्ड ३१३ झेलांसह अव्वलस्थानी आहे.
1️⃣0️⃣0️⃣ T20 catches for @henrygayle.👊🏽#WIvENG #MissionMaroon #T20WorldCup pic.twitter.com/2TEcnaWOyS
— Windies Cricket (@windiescricket) October 23, 2021
विशेष म्हणजे, टी२० विश्वचषकात वेस्ट इंडिजकडून पहिलावहिला झेल गेलनेच पकडला होता. रामपॉलच्या गोलंदाजीवर २००७ मध्ये त्याने हा पराक्रम केला होता. त्यानंतर आता २०२१ वर्षांतील वेस्ट इंडिजकडूनचा पहिला झेलही गेलनेच घेतला आहे. यावेळीही त्याने रामपॉलच्या गोलंदाजीवरच हा झेल टिपला आहे.
या सामन्यात इंग्लंड संघाने नाणेफेक जिंकून प्रथम गोलंदाजी करण्याचा निर्णय घेतला होता. तर प्रथम फलंदाजी करण्यासाठी आलेल्या वेस्ट इंडिज संघाकडून केवळ एकाच फलंदाजाला १० पेक्षा अधिक धावा करता आल्या. ख्रिस गेलने सर्वाधिक १३ धावांची खेळी केली. तर इतर कुठल्याही फलंदाजाला १० धावांचा टप्पा देखील गाठता आला नाही. वेस्ट इंडीज संघाचा डाव १४.२ षटकात ५५ धावांवर संपुष्टात आला. या धावांचा पाठलाग करताना इंग्लंड संघाकडून जोस बटलरने सर्वाधिक २४ तर जेसन रॉयने ११ धावांची खेळी केली आणि इंग्लंड संघाला हा सामना ६ गडी राखून जिंकून दिला.
महत्त्वाच्या बातम्या-
वेस्ट इंडिज वि. इंग्लंड सामन्यापूर्वी दोन्ही देशातील खेळाडू का बसले गुडघ्यावर? कारण अभिमानास्पद
“रिमेंबर द नेम, कार्लोस ब्राथवेट” या ऐतिहासिक शब्दांचे जनक इयान बिशप्स