आयपीएल २०२६ (IPL 2026) सुरू होण्यापूर्वी दिल्ली कॅपिटल्स संघातील एका खेळाडूने अप्रतिम कामगिरी केली आहे. भारताची देशांतर्गत स्पर्धा ‘रणजी ट्रॉफी’मध्ये जम्मू-काश्मीरकडून खेळताना आकिब नबी याने घातक गोलंदाजीचे प्रदर्शन केले आहे. मध्य प्रदेशविरुद्धच्या सामन्यात त्याने वादळी गोलंदाजी करत ७ बळी टिपले आहेत. त्याच्या या भेदक माऱ्यासमोर मध्य प्रदेशचे सर्व फलंदाज पूर्णपणे हतबल झालेले पाहायला मिळाले. आयपीएल २०२६ साठी झालेल्या मिनी ऑक्शनमध्ये दिल्ली कॅपिटल्सने नबीला ८.४० कोटी रुपयांना विकत घेतले होते.
आयपीएल २०२६ मध्ये दिल्ली कॅपिटल्ससाठी आपली चमक दाखवण्यासाठी सज्ज असलेला आकिब नबी रणजी ट्रॉफीच्या या हंगामात जबरदस्त फॉर्ममध्ये दिसत आहे. मध्य प्रदेशविरुद्धच्या सामन्यात त्याने धडाकेबाज कामगिरी करत १८.४ षटकांत अवघ्या ४० धावा देऊन ७ विकेट्स घेतल्या. त्याच्या या धारदार गोलंदाजीसमोर रजत पाटीदारच्या मध्य प्रदेश संघाचा डाव ५३.४ षटकांत १५२ धावांवर आटोपला. पहिल्या डावानंतर आता जम्मू-काश्मीरकडे ४२ धावांची आघाडी आहे.
दिल्ली कॅपिटल्सच्या संघाला आकिबकडून आयपीएलच्या आगामी हंगामातही अशाच कामगिरीची अपेक्षा असेल. लिलावात त्याला आपल्या संघात घेण्यासाठी अनेक संघ शर्यतीत होते, पण अखेर दिल्लीने ८.४० कोटींची बोली लावून बाजी मारली. त्याने आतापर्यंत खेळलेल्या ३४ टी-२० सामन्यांत ४३ विकेट्स घेतल्या आहेत.
रणजी ट्रॉफीच्या या हंगामातील दुसरा उपांत्यपूर्व (Quarter-Final) सामना इंदूरच्या मैदानावर खेळला जात आहे. जम्मू-काश्मीरच्या संघाने पहिल्या डावात फलंदाजी करताना १९४ धावा केल्या होत्या. याला प्रत्युत्तर देताना मध्य प्रदेशची फलंदाजी आकिब नबीच्या गोलंदाजीसमोर पत्त्यांसारखी कोसळली. मध्य प्रदेशकडून केवळ यश दुबे हा एकटाच असा फलंदाज होता ज्याने ५८ धावांची खेळी करून थोडा प्रतिकार केला.
