भारताचे दिग्गज विकेटकिपर, ज्यांनी इंग्लंडला बनवले घर; निवृत्तीनंतर वादग्रस्त वक्तव्यांनी राहिले चर्चेत, वाचा त्यांच्याबद्दल

भारतीय संघाचे (Team India) माजी दिग्गज यष्टीरक्षक फलंदाज फारूख इंजिनीयर (Farokh Engineer) आज (२५ फेब्रुवारी) त्यांचा ८४ वा वाढदिवस साजरा करत आहेत. त्यांचा जन्म २५ फेब्रुवारी १९३८ मध्ये मुंबईत (तेव्हाची बॉम्बे) झाला होता. त्यांनी १९६१ मध्ये इंग्लंडविरुद्धच्या कसोटी सामन्यातून भारतीय संघासाठी कसोटी पदार्पण केले होते. त्यानंतर त्यांची कारकिर्दी पुढे खूप काळ चालली. त्यांचा काळातील दिग्गज यष्टीरक्षक फलंदाजांमध्ये इंजिनीयर यांचे नाव घेतले जात असायचे.

२३ जानेवारी १९७५ मध्ये वेस्ट इंडीजविरुद्ध शेवटचा कसोटी सामना खेळणारे फारूख इंजिनीयर यांनी कारकिर्दीत ४६ कसोटी सामने खेळले आणि यामध्ये ३१.०८ च्या सरासरीने २६११ धावा केल्या. यामध्ये त्यांचे दोन शतके आणि १६ अर्धशतकांचा समावेश आहे. यादरम्यान त्यांची सर्वाधिक धावसंख्या १२१ धावा होती. यष्टीरक्षकांच्या भूमिकेत त्यांनी ८२ खेळाडूंना बाद केले, यामध्ये ६६ झेलबाद, तर १६ स्टंपिंगचा समावेश आहे.

इंजिनीयर यांनी जुलै १९७४ मध्ये एकदिवसय पदार्पण केले. एकदिवसीय क्रिकेटमध्ये खेळलेल्या पाच सामन्यात त्यांनी ११४ धावा केल्या. शेवटचा एकदिवसीय सामना त्यांनी जून १९७५ मध्ये न्यूझीलंडविरुद्ध खेळला होता. देशांतर्गत क्रिकेटमधील त्यांच्या कारकिर्दीचा विचार केला, तर इंजीनियर एकूण ३३५ सामने खेळले आणि यामध्ये १३,४३६ धावा केल्या. प्रथम श्रेणी क्रिकेटमध्ये त्यांच्या नावावर एकूण १३ शतके आणि ६९ अर्धशतके आहेत.