भारतीय संघाचा मुख्य प्रशिक्षक गौतम गंभीरचा संघावरील प्रभाव कमी होत आहे का, याबद्दल क्रिकेट वर्तुळात चर्चा रंगली आहे. एका अहवालानुसार, महत्त्वाच्या सामन्यांमधील सलग पराभवांनंतर गंभीरचे निर्णय आणि कार्यपद्धती यांवर प्रश्नचिन्ह उपस्थित केले जात आहे. काही वरिष्ठ खेळाडूंनीही त्याच्याबद्दल नाराजी व्यक्त केल्याचा दावा या अहवालात करण्यात आला आहे.
बीसीसीआयचे काही अधिकारीही गंभीरच्या कार्यपद्धतीवर नाखूश असल्याचे समजते. पराभवांची वैयक्तिक जबाबदारी स्वीकारण्याऐवजी, तो सहसा सपोर्ट स्टाफ किंवा खेळाडूंवर दोष ढकलतो, अशी चर्चा आहे.
गंभीर यांच्या विरोधात वातावरण तयार होत आहे का?
अहवालात म्हटले आहे की, काही बोर्ड अधिकाऱ्यांना असे वाटते की अपयशासाठी गंभीर अनेकदा सेंटर ऑफ एक्सलन्स (CoE) किंवा सपोर्ट स्टाफला जबाबदार धरतो. त्याला अजूनही बीसीसीआयचा पाठिंबा असल्याचे मानले जात असले तरी, काही अधिकाऱ्यांच्या मते, संघ व्यवस्थापनाबाबत त्याला मिळालेल्या व्यापक अधिकारांचा त्याने प्रभावीपणे वापर केलेला नाही. त्याच्या पसंतीच्या सपोर्ट स्टाफची निवड आणि निर्णय प्रक्रियेवर त्याचा असलेला मोठा प्रभाव यांबाबतही प्रश्न उपस्थित केले गेले आहेत.
श्रीलंका दौरा ठरणार अग्निपरीक्षा
बीसीसीआयमधील बदलत्या वातावरणाबद्दल चर्चा होत असली तरी, आगामी श्रीलंका दौरा गौतम गंभीरसाठी एक महत्त्वाची कसोटी मानला जात आहे. जर या मालिकेतही भारताची कामगिरी निराशाजनक राहिली, तर त्याच्या कार्यकाळाबाबत अधिक शंका उपस्थित होऊ शकते. मात्र, त्याच्यासाठी दिलासादायक बाब म्हणजे त्याचा 2027 पर्यंतचा करार. विश्वचषकाला एक वर्षापेक्षा कमी कालावधी उरलेला असताना, बीसीसीआय मुख्य प्रशिक्षकाला बदलण्याची शक्यता कमी मानली जात आहे.
