टीम इंडियाचा माजी अष्टपैलू खेळाडू इरफान पठाणने, २२ फेब्रुवारी २०२६ रोजी अहमदाबाद येथे होणाऱ्या टी-२० वर्ल्ड कपच्या अत्यंत महत्त्वाच्या ‘सुपर-८’ सामन्यापूर्वी, दक्षिण आफ्रिकेचा वेगवान गोलंदाज लुंगी एनगिडीच्या वैविध्यपूर्ण गोलंदाजीचा सामना करण्यासाठी हार्दिक पांड्याला काही खास टिप्स दिल्या आहेत.
’जिओ हॉटस्टार’च्या ‘गेम प्लॅन’ या कार्यक्रमात बोलताना इरफानने हार्दिकच्या जुळवून घेण्याच्या क्षमतेवर भर दिला. तो म्हणाला, “हार्दिक पांड्या हा अष्टपैलू प्रतिभेचा खेळाडू आहे. तो नवीन चेंडूने, मधल्या षटकांत आणि डेथ ओव्हर्समध्येही गोलंदाजी करतो. फलंदाजी करताना तो डावाचा शेवट करू शकतो आणि प्रसंगी अँकरची (डाव सावरून धरण्याची) भूमिकाही बजावू शकतो. त्याची जागा कोणीही घेऊ शकत नाही. दक्षिण आफ्रिकेविरुद्ध तो महत्त्वाची भूमिका बजावेल. जर तुम्ही त्याला स्लोअर बाउन्सर टाकला, तर तो चेंडूची वाट पाहून आपल्या ताकदीचा वापर करू शकतो. पण जर तुम्ही चेंडू फुल (Full) टाकला, तर तो तुम्हाला क्लीन बोल्डही करू शकतो.”
टी-२० वर्ल्ड कप २०२६ मध्ये हार्दिक पांड्याने आतापर्यंत ४ सामन्यात २१.७५ च्या सरासरीने आणि १५५.३५ च्या स्ट्राइक रेटने ८७ धावा केल्या आहेत. दुसरीकडे, लुंगी एनगिडीने तीन सामन्यांत ७.५८ च्या इकॉनॉमी रेटने ८ बळी घेतले आहेत. आता अहमदाबादच्या नरेंद्र मोदी स्टेडियमवर कोण कोणावर वरचढ ठरतं, हे पाहणं औत्सुक्याचं ठरेल.
पुढे बोलताना इरफानने एनगिडीविरुद्धच्या आव्हानांबद्दल सविस्तर सांगितले. तो म्हणाला, “जर गोलंदाजांनी गुड लेंथ एरियामध्ये चेंडू टाकला नाही आणि हार्दिकला हवा तसा चेंडू मिळाला नाही, तर तो त्यांना नक्कीच चोप देईल. नेदरलँड्सविरुद्ध त्याने हेच केलं होतं; त्याने धीम्या चेंडूची वाट पाहिली आणि तो थेट मैदाबाहेर टोलवला. मला मनापासून आशा आहे की, जेव्हा लुंगी एनगिडी हार्दिक पांड्याला गोलंदाजी करेल, तेव्हा हार्दिक ती लढत जिंकेल. मात्र, हार्दिकला थोड्या ‘फुलर’ (Fuller) चेंडूंबाबत सावध राहावे लागेल, जे चेंडू जास्त आखूड नाहीत. त्याला इतर गोलंदाजांच्या तुलनेत एनगिडीच्या चेंडूची थोडा जास्त वेळ वाट पाहावी लागेल.”
