WI vs IND | वेस्ट इंडीजविरुद्ध मिळालेल्या यशाचे श्रेय आयपीएललाचं, वाचा शिखर धवन काय म्हणाला

शिखर धवनच्या नेतृत्वातील भारतीय संघाने वेस्ट इंडीज दौऱ्यातील एकदिवसीय मालिका नावावर केली आहे. मालिकेतील पहिल्या सामन्यापाठोपाठ रविवारी (२४ जुलै) भारतीय संघाने दुसरा सामना २ विकेट्स राखून जिंकला. वेस्ट इंडीजमध्ये एकदिवसीय मालिकेत शिखर धवन पहिल्यांदाच संघाचे नेतृत्व करत असून त्याने ही जबाबदारी चोखपणे पार पाडल्याचे दिसते. दुसऱ्या एकदिवसीय सामन्यात भारतीय संघाला मिळालेल्या विजयानंतर कर्धणार धवनने खेळाडूंच्या चांगल्या प्रदर्शनाचे श्रेय आयपीएलला दिले. 

भारतीय संघ सध्या मालिकेत ०-२ अशा विजयी आघाडीवर आहे. दुसरा सामना जिंकल्यानंतर भारतीय कर्णधार शिखर धवन (Shikhar Dhawan) खूपच आनंदी होता. तो म्हणाला की, “एका संघाच्या रूपात हे खूप चांगले प्रदर्श होते. संघातील खेळाडूंनी त्यांचा आत्मविश्वास गमावला नाही आणि हे अद्भुत आहे. श्रेयस अय्यर, संजू सॅमसन आणि अक्षर पटेल सर्वांनी कमाल केली. आवेश खाननेही पदार्पणाच्या सामन्यात संघासाठी महत्वाच्या ११ धावा केल्या. त्याव्यतिरिक्त आयपीएलचे देखील धन्यवाद, जिथे खेळाडू मोठ्या मंचावर प्रदर्शन करतात आणि याचा फायदा संघाला होतो.”

धवन पुढे बोलताना म्हणाला की, “मला वाटते आम्ही चांगली गोलंदाजी केली आणि त्यांनीही चांगली सुरुवात केली होती. शाई होप आणि कर्णधार निकोलस पूरनने चांगली फलंदाजी केली. आम्ही विचार केला की, जर ते असे करू शकतात (३११ धावा करू शकतात) तर आम्हीही असे करू शकतो. आम्ही थोडी हळू सुरुवात केली, पण शुबमन गिलने (४३) उत्कृष्ट फलंदाजी केली. श्रेयस अय्यर (६३) आणि संजू सॅमसन (५४) यांच्या भागीदारीमुळे चांगलाच फरक पडला. संजू धावबाद झाला, पण असे होत असते. खेळाडू अजून शिकत आहेत आणि आपल्या सपोर्ट स्टाफचेही आभार मानतो, कारण ते जबरदस्त काम करत आहेत.”