IPL 2020: मुंबई आणि बेंगलोर येणार आमने सामने; जिंकणारा संघ गाठणार प्लेऑफ

आयपीएल २०२० चा ४८ वा सामना बुधवारी (२८ ऑक्टोबर) मुंबई इंडियन्स विरुद्ध रॉयल चॅलेंजर्स बेंगलोर संघात होणार आहे. या सामन्यात मुंबईचा कर्णधार रोहित शर्मा दुखापतींमुळे सलग तिसऱ्या सामन्यात बाहेर राहण्याची शक्यता आहे. मुंबईला मागील सामन्यात राजस्थान रॉयल्सने ८ विकेट्सने पराभूत केले होते. ते गुणतालिकेत पहिल्या क्रमांकावर असून त्यांचे १४ गुण आहेत, तर बेंगलोर संघही रविवारी चेन्नई सुपर किंग्सविरुद्ध पराभूत झाला असून तो गुणतालिकेत दुसऱ्या स्थानी आहे. त्यांचेही १४ गुण आहेत. अशात मुंबई आणि बेंगलोर संघात प्लेऑफमध्ये स्थान निश्चित करण्यासाठी झुंज पाहायला मिळेल.

चर्चेत आहे रोहितची फीटनेस

रोहितला हॅमस्ट्रिंगच्या दुखापतीमुळे मागील दोन सामन्यांमध्ये खेळता आले नव्हते. सोमवारी (२६ ऑक्टोबर) रोहित नेट्सवर सराव करताना दिसला. याचदिवशी ऑस्ट्रेलिया दौऱ्यासाठी भारतीय संघाची निवड झाली होती. मात्र यामध्ये रोहितची निवड करण्यात आली नव्हती. मुंबई इंडियन्स आणि बीसीसीआयकडून रोहितच्या फीटनेसबाबत कोणतेही स्पष्ट वक्तव्य करण्यात आलेले नाही.

सौरभ तिवारी आणि इशान किशनवर विश्वास

रोहितच्या अनुपस्थितीत मुंबईला सौरभ तिवारी आणि इशान किशनवर विश्वास ठेवावा लागेल. क्विंटन डी कॉक (३७४) राजस्थानविरुद्ध खेळलेल्या सामन्यात अपयशी ठरला होता. तोदेखील या सामन्यात चांगली कामगिरी करत पुनरागमन करण्याचा प्रयत्न करेल. किशन (२९८) आणि सूर्यकुमार यादव (२८३) यांनी आतापर्यंत या हंगामात चांगली कामगिरी केली आहे. हार्दिक पंड्याव्यतिरिक्त प्रभारी कर्णधार कायरन पोलार्ड आणि कृणाल पंड्याही चांगली फटकेबाजी करू शकतात.

नवीन सुरुवात

मुंबईचे गोलंदाज मागील सामन्यातील पराभव विसरून नवीन सुरुवात करतील. मागील सामन्यात त्यांना राजस्थानच्या बेन स्टोक्स आणि संजू सॅमसनसमोर मोठा संघर्ष करावा लागला होता. ट्रेंट बोल्ट आणि जसप्रीत बुमराह यांनी आतापर्यंत मुंबईच्या गोलंदाजी विभागाची जबाबदारी उत्तमरीत्या पार पाडली आहे. या दोघांनीही मिळून ३३ विकेट्स घेतल्या आहेत. तिसरा वेगवान गोलंदाज म्हणून मुंबई इंडियन्सला जेम्स पॅटिन्सन किंवा नेथन कुल्टर नाईलपैकी एकाला निवडावे लागेल.

-काय सांगता! एबी डिविलियर्सची ‘या’ प्रसिद्ध टी२० लीगमधून माघार