भारतीय क्रिकेट संघ इंग्लंड दौऱ्यासाठी पूर्णपणे सज्ज झाला आहे. विराट कोहली, रोहित शर्मा आणि आर. अश्विन यांनी कसोटी क्रिकेटमधून निवृत्ती घेतल्यानंतर, यावेळी संघाची धुरा ही युवा फलंदाज शुभमन गिलकडे आहे, तो त्याच्या नेतृत्वाखाली इंग्लंडमध्ये युवा संघासोबत पहिली कसोटी मालिका खेळणार आहे. भारत आणि इंग्लंडमध्ये शुक्रवार, 20 जूनपासून एकूण 5 कसोटी सामने खेळले जातील. विशेष म्हणजे यावेळी कसोटी सामन्यांचे लाईव्ह टेलिकास्ट आणि स्ट्रीमिंग प्लॅटफॉर्म पूर्णपणे बदलण्यात आले आहे. यावेळी चाहते स्टार स्पोर्ट्सवर ही मालिका लाईव्ह पाहू शकणार नाहीत.
आयपीएल 2025 चे थेट प्रक्षेपण स्टार स्पोर्ट्स नेटवर्क आणि जिओ हॉटस्टारवर केले जात होते, परंतु आता हे प्लॅटफॉर्म भारत-इंग्लंड कसोटी मालिकेसाठी बदलले आहे. आता ही कसोटी मालिका सोनी स्पोर्ट्स नेटवर्कवर थेट प्रक्षेपित केली जाईल.
शुभमन गिलसाठी हा दौरा खूप खास असणार आहे कारण तो पहिल्यांदाच कर्णधार म्हणून कसोटी सामना खेळणार आहे. इंग्लंडमधील कसोटी मालिका नेहमीच खास मानली जाते आणि चाहत्यांना गिलच्या नेतृत्वाखालील टीम इंडियाकडून खूप अपेक्षा आहेत असे दिसून येत आहे. हा तरुण कर्णधार इंग्लंड संघाला त्यांच्याच घरच्या मैदानावर कसे हरवेल हे पाहणे मनोरंजक असेल.
