जगातील सर्वात मोठी टी20 लीग म्हणून ओळखल्या जाणाऱ्या आयपीएल 2023च्या हंगामासाठी चाहते खूपच उत्सुक आहेत. आयपीएलचा लिलाव 23 डिसेंबर रोजी कोचीमध्ये होणार आहे. यामध्ये ऑस्ट्रेलियाचा जबरदस्त अष्टपैलू कॅमेरॉन ग्रीन हादेखील सामील आहे, त्याच्यावर सर्व संघांच्या नजरा असतील. अशातच स्वत: आयपीएल 2023 स्पर्धेतून माघार घेणाऱ्या पॅट कमिन्स याने ग्रीनच्या लिलावा प्रक्रियेत भाग घेण्याबाबत मोठे वक्तव्य केले आहे.
ऑस्ट्रेलियाचा कसोटी आणि वनेड संघाचा कर्णधार पॅट कमिन्स (Pat Cummins) याने कॅमेरॉन ग्रीन (Cameron Green) याच्या आयपीएल लिलावाविषयी भाष्य केले. त्याची अशी इच्छा आहे की, ग्रीनने राष्ट्रीय संघासाठी संपूर्ण शक्ती लावावी. मात्र, तो या युवा अष्टपैलूला आयपीएल 2023 (IPL 2023)मध्ये भाग घेण्यापासून रोखणार नाही. 23 वर्षीय ग्रीनकडे ऑस्ट्रेलियाचे भविष्य म्हणून पाहिले जात आहे. त्याने भारत दौऱ्यावर डेविड वॉर्नर याच्या अनुपस्थितीत डावाची सुरुवात करत सर्वांचे लक्ष वेधले होते. त्याने या दौऱ्यावर अर्धशतक झळकावले होते. तसेच, 214.54च्या स्ट्राईक रेटने आणि 39.22च्या सरासरीने धावा चोपल्या होत्या.
पॅट कमिन्स याने माध्यमांशी बोलताना म्हटले की, “हो, तो या शर्यतीत (आयपीएल लिलावात) सामील होऊ शकतो. आम्ही वाट पाहू, मला वाटते की, लिलावासाठी अजून बराच वेळ आहे. एक कर्णधार म्हणून मी स्वार्थी झालो, तर मला वाटेल की, त्याने ऑस्ट्रेलियासाठी आपली सर्व शक्ती वाचवली पाहिजे.” पुढे बोलताना तो म्हणाला की, “मात्र, तुम्ही कुणालाही ही (आयपीएल) संधी नाकारण्यास कसे काय सांगू शकता?”
ऑस्ट्रेलियाच्या कसोटी आणि वनडे संघाचे नेतृत्व करणाऱ्या कमिन्सने आंतरराष्ट्रीय क्रिकेटमधील व्यस्त वेळापत्रक पाहून आयपीएल 2023मधून बाहेर पडण्याचा निर्णय घेतला आहे.
ऑस्ट्रेलियाच्या 2023मधील व्यस्त कसोटी क्रिकेट वेळापत्रकामध्ये भारतात बॉर्डर- गावसकर ट्रॉफी स्पर्धा फेब्रुवारी ते मार्चदरम्यान खेळवली जाणार आहे. त्यानंतर इंग्लंडमध्ये 16 जून ते 31 जुलैदरम्यान ऍशेज मालिकाही खेळली जाणार आहे. वनडे विश्वचषक पुढील वर्षी ऑक्टोबर- नोव्हेंबर महिन्यात भारतात आयोजित केला जाईल. याकडेही क्रिकेट प्रेमींचे लक्ष लागले आहे. (Pat Cummins will not stop Cameron Green from playing ipl 2023)
महास्पोर्ट्सचा व्हॉट्सअप ग्रूप जॉईन करण्यासाठी येथे क्लिक करा
महास्पोर्ट्सचा टेलिग्राम ग्रूप जॉईन करण्यासाठी येथे क्लिक करा
महत्वाच्या बातम्या-
व्हिडिओ एक, मूड्स अनेक! आयसीसीने दाखवली विराटची टी20 विश्वचषकातील प्रत्येक रिऍक्शन, एकदा पाहाच
आंद्रे रसेलने हद्दच केली पार! थेट मॉलमध्येच झाला NUDE, फोटो पाहिला का?
