५ ‘असे’ खेळाडू, ज्यांचे रोहित वनडेचा कर्णधार होताच चमकू शकते नशीब

भारतीय क्रिकेट संघाचा नियमित कर्णधार विराट कोहली आहे. परंतु सातत्याने चाहते रोहित शर्माकडे संघाचे कर्णधारपद सोपविण्याची मागणी करत आहेत. खरंतर अडीच वर्षांपेक्षा अधिक काळ झाला विराटच्या नेतृत्वात भारताला एकही मोठी ट्रॉफी जिंकता आलेली नाही, तर रोहितने भारतीय संघाला निदाहास ट्रॉफी आणि आशिया चषकात विजय मिळवून दिला आहे.

आयपीएलमध्ये रोहित (Rohit Sharma)  आपल्या शानदार नेतृत्वासाठी ओळखला जातो. त्याने आयपीएलच्या ४ मोसमात विजेतेपद मिळवून दिले आहे. त्यामुळे जर काही काळानंतर संघ व्यवस्थापन मोठा निर्णय घेत मर्यादित षटकांच्या भारतीय संघाचे नेतृत्व रोहितकडे सोपविले तर भारतीय संघाच्या काही खेळाडूंचे भाग्य चमकू शकते.

या लेखात आपण भारतीय संघाच्या त्या ५ खेळाडूंबद्दल जाणून घेणार आहोत, ज्यांना रोहित कर्णधार झाल्यानंतर फायदा होऊ शकतो.

रोहित कर्णधार झाल्यावर या ५ खेळाडूंना मिळणार फायदा- These 5 players will benefit when Rohit becomes the captain

१. रिषभ पंत

भारतीय संघाचा यष्टीरक्षक फलंदाज रिषभ पंतला (Rishabh Pant) सुरुवातीपासूनच धोनीचा उत्तराधिकारी मानले जात आहे. त्याला ऑस्ट्रेलियाविरुद्धच्या वनडे मालिकेत खेळण्याची संधी मिळाली होती. यानंतर पंतला भारतीय संघाच्या १५ सदस्यांमध्ये स्थान मिळते. परंतु त्याला मर्यादित षटकांच्या संघात खेळण्याची संधी मिळत नाहीये.

न्यूझीलंड दौऱ्यात ५ टी२० व ३ वनडे सामन्यांची मालिका खेळण्यात आली होती. त्यावेळी संघात यष्टीरक्षक फलंदाज म्हणून केएल राहुलला (KL Rahul) संधी दिली होती. ज्याप्रकारे विराट (Virat Kohli) पंतच्या जागी राहुलला यष्टीरक्षणाची जबाबदारी देत आहे. ते पाहून लवकरच पंतला संघातून वगळण्याची शक्यता आहे. परंतु जर संघाचे नेतृत्व रोहितकडे सोपविले, तर रोहित नक्कीच पंतला संघात खेळण्याची संधी देऊ शकतो.