ऋतुराजला कशी मिळाली भारतीय संघात निवड झाल्याची बातमी? किस्सा आहे अतिशय रोमांचक

आपल्या देशाचे प्रतिनिधित्व करणे हे प्रत्येक खेळाडूचे स्वप्न असते. त्यातही अपेक्षा नसताना अचानक राष्ट्रीय संघाकडून बोलावणे आले तर त्या खेळाडूला आणि त्याच्या कुटुंबीयांना सुखद धक्का बसतो. नुकतेच भारताच्या श्रीलंका दौऱ्यासाठी २० सदस्यीय भारतीय संघाची घोषणा झाली आहे. या संघात तब्बल ६ अनकॅप्ड (आंतरराष्ट्रीय पदार्पण न झालेले) खेळाडूंचा समावेश आहे. यातीलच एक नाव म्हणजे, मराठमोळा ऋतुराज गायकवाड याचे. याच ऋतुराजने पहिल्यांदाच भारतीय संघात निवड झाल्याचे वृत्त कसे मिळाले? यावेळी कुटुंबीयांची प्रतिक्रिया काय होती?, याबद्दल उलगडा केला आहे.

२४ वर्षीय ऋतुराजला निवडीच्या रात्री (१० जून) अचानक आपला फोन वाजू लागल्याने आपला कोणता मित्र अडचणीत असल्यासारखे वाटल्याचे त्याने सांगितले आहे. अखेर त्याला आपल्या निवडीची माहिती काही पत्रकरांद्वारे मिळाली.

क्रिकइंफोमधील वृत्तानुसार, ऋतुराजला रात्री लवकर झोपण्याची सवय आहे. तो झोपण्यापुर्वी आपल्या मोबाईलचा डाटा बंद करतो. परंतु गुरुवारी (१० जून) रात्री त्याला भरपूर कॉल आले. त्याला वाटले की, खूप जास्त गंभीर आणि महत्त्वाचे काही असेल कोणीही जास्तीत जास्त २ वेळा त्याला कॉल करेल. परंतु त्या रात्री त्याला भरपूर कॉल आहे. त्यामुळे तो गोंधळून गेला होता.

शेवटी त्याच्या ओळखीच्या दोन पत्रकारांनी त्याला त्याच्या निवडीची बातमी सांगितली. मग त्वरित ही आनंदवार्ता आपल्या आई-वडिलांना सांगण्यासाठी ऋतुराजने त्यांच्याकडे धाव घेतली. परंतु ते दोघेही गाढ झोपेत असल्याचे त्यांना काही समजले नाही. परंतु ऋतुराजने दुसऱ्या दिवशी सकाळी उठून पाहिले तर त्याच्या घरात गोड-धोड बनवले जात होते.

१३ जुलैपासून भारताच्या श्रीलंका दौऱ्याला सुरुवात होणार आहे. या दौऱ्यावर उभय संघांना ३ सामन्यांची वनडे आणि टी२० मालिका खेळायची आहे.