टी-२० विश्वचषक २०२६ मध्ये अमेरिकेविरुद्ध अत्यंत कठीण परिस्थितीत भारतीय कर्णधार सूर्यकुमार यादवने एक शानदार खेळी खेळत संघाला बिकट परिस्थितीतून बाहेर काढले. शनिवारी मुंबईच्या वानखेडे स्टेडियमवर खेळल्या जात असलेल्या सामन्यात सूर्यकुमार यादवने ४९ चेंडूंमध्ये नाबाद ८४ धावांची झुंजार खेळी केली. त्याच्या या खेळीत त्याने १० चौकार आणि ४ षटकार मारले.
मात्र, भारताची सुरुवात खूपच खराब झाली. नाणेफेक हरल्यानंतर प्रथम फलंदाजी करताना, टीम इंडियाला दुसऱ्याच षटकात पहिला धक्का बसला. सलामीवीर अभिषेक शर्मा पहिल्याच चेंडूवर शून्यावर बाद झाला. ईशान किशन (२०) आणि तिलक वर्मा (२५) यांनी थोडा प्रतिकार केला, पण मोठी खेळी खेळण्यात अपयशी ठरले. शिवम दुबे शून्यावर बाद झाला, तर रिंकू सिंग (६) आणि हार्दिक पांड्या (६) यांनाही दुहेरी आकडा गाठता आला नाही. भारताने अवघ्या ७७ धावांत सहा गडी गमावले होते.
या नाजूक क्षणी, कर्णधार सूर्यकुमार यादवने संयम आणि आक्रमकता यांचा योग्य समतोल साधत डाव सावरला. त्याने ३६ चेंडूंमध्ये आपले अर्धशतक पूर्ण केले, जे टी-२० आंतरराष्ट्रीय सामन्यांमधील त्याचे २५वे अर्धशतक होते. उपकर्णधार अक्षर पटेल (१४) सोबत, सूर्यकुमारने सातव्या विकेटसाठी ४१ धावांची महत्त्वपूर्ण भागीदारी रचली आणि भारताला सन्मानजनक धावसंख्येपर्यंत पोहोचवले.
या खेळीमुळे सूर्यकुमार यादव टी-२० विश्वचषकाच्या इतिहासात सर्वाधिक धावा करणाऱ्या भारतीय फलंदाजांच्या यादीत चौथ्या स्थानावर पोहोचला आहे. त्याच्या नावावर आता १९ सामन्यांत ५६४ धावा आहेत. यासह, त्याने माजी कर्णधार एम.एस. धोनी (५२९ धावा) आणि सध्याचा मुख्य प्रशिक्षक गौतम गंभीर (५२४ धावा) यांना मागे टाकले आहे. आता युवराज सिंगच्या ५९३ धावांचा विक्रम त्याच्या नजरेसमोर आहे. या यादीत विराट कोहली (१२९२) आणि रोहित शर्मा (१२२०) पहिल्या दोन स्थानांवर आहेत.
टी20 विश्वचषकात सर्वाधिक धावा करणारा भारतीय खेळाडू
१२९२ – विराट कोहली
१२२०- रोहित शर्मा
५९३- युवराज सिंग
५६४- सूर्यकुमार यादव
५२९ – एमएस धोनी
५२४- गौतम गंभीर
सूर्यकुमारच्या एकाकी लढ्यामुळे भारताने २० षटकांत ९ गडी गमावून १६१ धावा केल्या. शेवटच्या षटकात त्याने दोन चौकार आणि दोन षटकार मारून डावाला जोरदार शेवट दिला.
