सूर्यकुमार यादवच्या नेतृत्वाखाली भारतीय संघ आज टी-20 विश्वचषक 2026 मधील आपला पहिला सामना खेळण्यासाठी मैदानात उतरेल. जरी सूर्यकुमार बऱ्याच काळापासून भारतीय संघाचे कर्णधारपद भूषवत असला तरी, त्याला आयसीसी स्पर्धेत नेतृत्व करण्याची संधी पहिल्यांदाच मिळत आहे. भारताचा पहिला सामना आज मुंबईतील वानखेडे स्टेडियमवर अमेरिकेविरुद्ध होणार आहे. मात्र, या सामन्याला आणखी एक खास पैलू आहे. कारण आज प्रतिस्पर्धी संघात सूर्यकुमार यादवचा जुना मित्र खेळताना दिसणार आहे.
टी-20 विश्वचषक 2026 मध्ये सहभागी झालेल्या अमेरिकेच्या संघात केवळ चार खेळाडूंचा जन्म अमेरिकेत झाला आहे. उर्वरित बहुतेक खेळाडूंचा जन्म इतर देशांमध्ये झाला असून ते नंतर अमेरिकेत स्थायिक झाले. या संघात पाकिस्तानमध्ये जन्मलेल्या तीन खेळाडूंचाही समावेश आहे. अमेरिकेच्या संघाचे नेतृत्व मोनांक पटेल करत आहे, ज्याचा जन्म भारतातील गुजरातमध्ये झाला आहे. भारतासोबतच्या सामन्यापूर्वी मोनांक पटेलने स्पष्ट केले की, अमेरिकेसाठी खेळताना कोणी भारतात जन्मले आहे की पाकिस्तानात, याने काही फरक पडत नाही. विशेष म्हणजे, अमेरिकेच्या संघातील अनेक खेळाडूंची मुळे भारताशी जोडलेली आहेत.
अमेरिकेच्या संघातील असाच एक खेळाडू म्हणजे हरमीत सिंग. 7 सप्टेंबर 1992 रोजी मुंबईत जन्मलेला हरमीत सिंग डावखुरा फलंदाज आणि फिरकी गोलंदाज आहे. तो सध्या सुमारे 33 वर्षांचा आहे. अमेरिकेसाठी खेळण्यापूर्वी हरमीत सिंगने इंडिया ‘बी’, इंडिया अंडर-19, मुंबई आणि ‘रेस्ट ऑफ इंडिया’ संघांचे प्रतिनिधित्व केले आहे.
विशेष म्हणजे, 2015 मध्ये, म्हणजेच सुमारे 11 वर्षांपूर्वी, सूर्यकुमार यादव आणि हरमीत सिंग एकाच संघात खेळले होते. त्या काळात ते दोघे एकत्र सहा प्रथम श्रेणी सामने खेळले. तेव्हापासून ते फक्त एकदाच प्रतिस्पर्धी म्हणून एकमेकांसमोर आले आहेत. 2024च्या टी-20 विश्वचषकात हरमीत सिंग अमेरिकेच्या संघाकडून भारताच्या विरोधात खेळला होता. त्या सामन्यात त्याने 10 चेंडूत 10 धावा केल्या होत्या आणि अर्शदीप सिंगने त्याला बाद केले होते. मात्र, त्या सामन्यात त्याला गोलंदाजीची संधी मिळाली नाही.
आता सूर्यकुमार यादव आणि हरमीत सिंग पुन्हा एकदा आमनेसामने येणार आहेत. जर या सामन्यात हरमीतला गोलंदाजीची संधी मिळाली, तर त्याचा सामना मधल्या फळीत फलंदाजी करणाऱ्या सूर्यकुमार यादवशी होऊ शकतो. तो क्षण चाहत्यांसाठी निश्चितच रोमांचक असेल. विशेष म्हणजे, हा सामना हरमीत सिंगसाठीही खास असणार आहे, कारण तो आपल्या जन्मभूमी मुंबईतील वानखेडे स्टेडियमवर अमेरिका संघाकडून खेळणार आहे. आता हरमीत सिंग या सामन्यात कशी कामगिरी करतो, याकडे सर्वांचे लक्ष लागले आहे.
