२०१८ चा एकोणीस वर्षाखालील मुलांचा क्रिकेट विश्वचषक न्यूझीलंडमध्ये होत होता. २०१६ च्या विश्वचषकात अंतिम फेरीत पराभूत झालेला भारतीय संघ पृथ्वी शॉ याच्या नेतृत्वात स्पर्धेत सामील झाला होता. भारताचा पहिला सामना ऑस्ट्रेलिया विरुद्ध होता. पृथ्वी शॉ, मनजोत कालरा व शुबमन गिल यांनी वैयक्तिक अर्धशतके झळकावत भारताला ३२८ धावांची मजल मारून दिली. दुसऱ्या डावात ऑस्ट्रेलिया चांगला प्रतिकार करेल अशी अपेक्षा असताना, भारताच्या वेगवान गोलंदाजीला पाहून भलेभले क्रिकेटपंडित व समीक्षक आवाक झाले. जगाने कधीही न पाहिलेले भारतीय वेगवान गोलंदाज कमलेश नागरकोटी, इशान पोरेल व शिवम मावी या तिकडीने सातत्याने १४० किमी/प्रतितास इतक्या तुफानी वेगाने गोलंदाजी करत ऑस्ट्रेलियाचा डाव २२८ धावांवर गुंडाळला. भारताच्या या संघाने शेवटपर्यंत अजिंक्य राहत विश्वचषक आपल्या नावे केला. पृथ्वी शॉ व शुबमन गिल या फलंदाजांसोबतच शिवम मावी व कमलेश नगरकोटी यांची सर्वांनीच मुक्तकंठाने प्रशंसा केली. त्यापैकी, शिवम मावीविषयी आपण जाणून घेऊया.

मेरठच्या मवाना तालुक्यातील सीना येथील मूळ रहिवासी असलेले पंकज मावी, गेली पंचवीस वर्ष नोएडामधील सेक्टर ७१ येथे राहतात. सेक्टरमधील गल्लीत शिवमचा खेळ पाहून लोक त्याची वाहवा करत. लोक करत असलेले कौतुक पाहून पंकज यांनी वयाच्या आठव्या वर्षी शिवमला, फुलचंद शर्मा यांच्या वंडर्स क्रिकेट अकादमीत दाखल करण्याचा निर्णय घेतला. घरातील इतरांची इच्छा होती की, शिवमने डॉक्टर किंवा इंजिनिअर व्हावे, मात्र पंकज यांनी शिवमला क्रिकेट खेळवायचे नक्की केले.

शिवमचे पहिले प्रशिक्षक असलेले फुलचंद शर्मा सांगतात,

“जेव्हा शिवम पहिल्यांदा अकादमीत आला तेव्हाच मी त्याचा वेग पाहून अचंबित झालो. १५ वर्षाच्या मुलांप्रमाणे तो गोलंदाजी करत होता. सोबतच, तो क्षेत्ररक्षणही अत्यंत चपळाईने करत. शिवमच्या प्रगतीचा वेग खूप अधिक होता.”

क्लब क्रिकेटमध्ये चांगली कामगिरी केल्याने, प्रशिक्षकांनी त्याला दिल्लीच्या १४ वर्षाखालील संघासाठी ट्रायल देण्यास सांगितले. अपेक्षेप्रमाणे त्याची निवड झाली. पुढील जम्मू काश्मीर दौऱ्यावर त्याला संघात सामील करण्यात आले. त्याला संघात सामील केले गेले मात्र, त्याच्या शाळेच्या मुख्याध्यापकांनी त्याला सुट्टी देण्यास नकार दिला. अखेर, मुख्याध्यापकांचे म्हणजे डावलून वडिलांनी त्याला जम्मू काश्मीर दौऱ्यावर पाठवले. ती स्पर्धा शिवमने एकहाती जिंकून दिली. पुढे त्याला उत्तर प्रदेशच्या चौदा वर्षाखालील व सोळा वर्षाखालील संघात स्थान दिले गेले.

शिवमच्या आत्तापर्यंतच्या कारकिर्दीत, त्याच्या परिवाराचे व वरिष्ठ खेळाडूंचे महत्त्वपूर्ण योगदान राहिले आहे. त्याची बहीण शालू त्याच्या खाण्यापिण्याची तसेच वेळेचे नियोजन करण्याचे काम करते. पंजाबचा माजी खेळाडू परविंदर अवाना व अनुरीत सिंग यांनी त्याला अगदी पहिल्यापासून मार्गदर्शन केले आहे.

शिवमला पहिल्यांदा संधी देणारी वंडर्स अकादमी नोएडातील सेक्टर-३४ मध्ये स्थलांतरित झाल्यानंतर, भारतीय खेळाडू सुरेश रैना त्याठिकाणी सरावासाठी येत. त्यावेळी सोळा वर्षाच्या शिवमने रैनाला बाद केले होते, तेव्हा रैनाने शिवमची खुल्या मनाने तारीफ केली.

युवा विश्वचषक गाजवत असतानाच, २०१८ आयपीएलसाठीचा लिलाव झाला. त्यावेळी अनेक संघांमध्ये शिवमला आपल्या चमूत दाखल करण्यासाठी रस्सीखेच चालू होती. अखेरीस, कोलकाता नाईट रायडर्सने तब्बल ३ करोड रुपयांची बोली लावत आपल्या संघात सामील करून घेतले. पहिलीच आयपीएल त्याने आपल्या वेगाने गाजवली.

२०१८ च्या देशांतर्गत हंगामा,त विजय हजारे ट्रॉफी स्पर्धेद्वारे त्याने लिस्ट ए क्रिकेटमध्ये पदार्पण केले. सौराष्ट्र विरुद्धच्या पहिल्याच सामन्यात हॅट्रिक घेत त्याने विक्रम नोंदवला‌. २०१९ हे दुखापतीने वाया गेल्यानंतर, यावर्षी तो आयपीएलमध्ये युएईतील मैदाने गाजवण्यास तयार आहे.

ब्रेट ली, इयान बिशप या दिग्गजांच्या म्हणण्यानुसार, शिवममध्ये भारतीय गोलंदाजी आक्रमणाचे नेतृत्व करण्याची क्षमता आहे. भविष्यात शिवम या दिग्गजांच्या म्हणण्यावर खरा उतरतो का ? हे पाहणे रंजक ठरेल.

वाचा-

-काय सांगता! एकाच सामन्यात टाकल्या गेल्या होत्या चक्क ७ चेंडूंच्या ३ ओव्हर

-भल्याभल्या गोलंदाजांना रडवणारा द्रविड ‘त्याची’ खेळी पाहून आला होता रडकुंडीला

-जेव्हा मुंबई इंडियन्सच्या ड्वेन ब्रावोसाठी अंबानींनी जमैकाला पाठवले थेट प्रायव्हेट जेट