आशियाई क्रिकेट परिषदेने (ACC) गुरुवारी महिला आशिया चषक 2026 चे अधिकृत वेळापत्रक जाहीर केले. या स्पर्धेतील सर्वात बहुप्रतिक्षित सामना भारत विरुद्ध पाकिस्तान 5 सप्टेंबर रोजी दुबई आंतरराष्ट्रीय क्रिकेट स्टेडियमवर होणार आहे. स्पर्धेची सुरुवात 28 ऑगस्ट रोजी होईल आणि सलामीचा सामना थायलंड व हाँगकाँग (चीन) यांच्यात खेळला जाईल.
टी20 फॉरमॅटमध्ये खेळली जाणारी ही महिला आशिया चषकाची सहावी आवृत्ती आहे. या स्पर्धेत आठ संघ सहभागी होणार असून त्यांची दोन गटांत विभागणी करण्यात आली आहे. ‘गट अ’ (Group A) मध्ये भारत, पाकिस्तान, थायलंड, हाँगकाँग (चीन) आणि चीन यांचा समावेश आहे, तर ‘गट ब’ (Group B) मध्ये श्रीलंका, बांगलादेश, संयुक्त अरब अमिराती (UAE) आणि इंडोनेशिया यांचा समावेश आहे.
प्रत्येक गटातील अव्वल दोन संघ उपांत्य फेरीसाठी पात्र ठरतील. पहिला उपांत्य सामना 10 सप्टेंबरला, दुसरा 11 सप्टेंबरला आणि अंतिम सामना 13 सप्टेंबरला खेळला जाईल. स्पर्धेतील सर्व सामने दुबई आंतरराष्ट्रीय क्रिकेट स्टेडियमवर फ्लडलाइट्सच्या प्रकाशात खेळवले जातील.
दरम्यान, बीसीसीआयने (BCCI) रविवारी महिला आशिया चषकासाठी भारतीय संघाची घोषणा केली होती. मात्र, एसीसीने (ACC) अद्याप अधिकृत वेळापत्रक जाहीर केले नसल्यामुळे ती घोषणा नंतर मागे घेण्यात आली. विशेष म्हणजे, 2026 च्या आशियाई क्रीडा स्पर्धेतील महिला क्रिकेट स्पर्धा 17 ते 24 सप्टेंबर या कालावधीत जपानमधील नागोया येथे होणार आहे.
श्रीलंका हा या स्पर्धेचा विद्यमान विजेता आहे. त्यांनी दांबुला येथे झालेल्या 2024 च्या अंतिम सामन्यात भारताचा पराभव करून हे विजेतेपद पटकावले होते.
महिला आशिया चषकाच्या इतिहासात भारत हा सर्वात यशस्वी संघ आहे. त्यांनी आतापर्यंत सात वेळा विजेतेपद जिंकले आहे. भारतीय संघ यावर्षी आठव्यांदा विजेतेपद मिळवण्याच्या उद्देशाने मैदानात उतरेल. दुसरीकडे, पाकिस्तानने ही स्पर्धा अद्याप जिंकलेली नाही.
महिला आशिया चषक 2026 मध्ये भारताचे सामने
30 ऑगस्ट: भारत विरुद्ध थायलंड
3 सप्टेंबर: भारत विरुद्ध हाँगकाँग (चीन)
5 सप्टेंबर: भारत विरुद्ध पाकिस्तान
महिला आशिया चषक 2026 वेळापत्रक
28 ऑगस्ट: थायलंड विरुद्ध हाँगकाँग (चीन)
29 ऑगस्ट: श्रीलंका विरुद्ध यूएई
30 ऑगस्ट: भारत विरुद्ध थायलंड
31 ऑगस्ट: बांगलादेश विरुद्ध इंडोनेशिया
1 सप्टेंबर: पाकिस्तान विरुद्ध थायलंड
2 सप्टेंबर: श्रीलंका विरुद्ध इंडोनेशिया
3 सप्टेंबर: भारत विरुद्ध हाँगकाँग (चीन)
4 सप्टेंबर: यूएई विरुद्ध इंडोनेशिया
5 सप्टेंबर: भारत विरुद्ध पाकिस्तान
6 सप्टेंबर: श्रीलंका विरुद्ध बांगलादेश
7 सप्टेंबर: पाकिस्तान विरुद्ध हाँगकाँग (चीन)
8 सप्टेंबर: बांगलादेश विरुद्ध यूएई
10 सप्टेंबर: पहिला उपांत्य सामना
11 सप्टेंबर: दुसरा उपांत्य सामना
13 सप्टेंबर: अंतिम सामना
