महिला प्रीमियर लीग (WPL) 2026 चा शेवटचा साखळी सामना 1 फेब्रुवारी रोजी यूपी वॉरियर्स आणि दिल्ली कॅपिटल्स यांच्यात खेळवण्यात आला. या निर्णायक सामन्यात दिल्ली कॅपिटल्सने 5 गडी राखून विजय मिळवत एलिमिनेटर फेरीतील आपले स्थान पक्के केले. या निकालासोबतच एलिमिनेटरमध्ये कोणत्या संघांचा सामना होणार, हेही स्पष्ट झाले.
या सामन्यात नाणेफेक हरल्यानंतर प्रथम फलंदाजी करणाऱ्या यूपी वॉरियर्स संघाला अपेक्षित कामगिरी करता आली नाही. दिल्लीच्या गोलंदाजांनी शिस्तबद्ध मारा करत यूपीला 122 धावांवर रोखले. मर्यादित धावसंख्येमुळे दिल्लीसमोर फारसे मोठे आव्हान नव्हते. 123 धावांचे लक्ष्य दिल्ली कॅपिटल्सने 18.4 षटकांत सहज गाठले आणि महत्त्वाचा विजय नोंदवला.
या विजयामुळे दिल्ली कॅपिटल्सने गुणतालिकेत आवश्यक स्थान मिळवत एलिमिनेटरमध्ये प्रवेश केला. आता एलिमिनेटर सामना दिल्ली कॅपिटल्स आणि गुजरात जायंट्स यांच्यात खेळवला जाणार आहे. हा सामना 3 फेब्रुवारी रोजी वडोदरा येथील कोटांबी स्टेडियमवर होणार आहे. विशेष म्हणजे रॉयल चॅलेंजर्स बंगळुरू संघाने आधीच अंतिम फेरीत थेट प्रवेश निश्चित केला आहे. एलिमिनेटरमधील विजेता संघ 5 फेब्रुवारी रोजी होणाऱ्या अंतिम सामन्यात आरसीबीशी दोन हात करणार आहे.
दरम्यान, या सामन्यानंतर गतविजेता मुंबई इंडियन्स आणि यूपी वॉरियर्स यांचा WPL 2026 मधील प्रवास संपुष्टात आला. मुंबई इंडियन्स संघाने साखळी फेरीत 8 पैकी केवळ 3 सामने जिंकले, तर 5 सामन्यांत पराभव स्वीकारावा लागला. 6 गुणांसह मुंबई चौथ्या क्रमांकावर राहिली. दुसरीकडे यूपी वॉरियर्स संघाची कामगिरी अधिकच निराशाजनक ठरली. यूपीने 8 पैकी फक्त 2 सामने जिंकले, तर 6 सामन्यांत पराभव पत्करावा लागला आणि 4 गुणांसह ते गुणतालिकेच्या शेवटच्या स्थानावर राहिले.
महत्त्वाचे म्हणजे WPL चा हा चौथा हंगाम आहे. 2023 मध्ये सुरू झालेल्या या लीगच्या पहिल्या आणि तिसऱ्या हंगामात मुंबई इंडियन्सने विजेतेपद पटकावले होते, तर 2024 मध्ये रॉयल चॅलेंजर्स बंगळुरूने बाजी मारली होती. आता WPL 2026 मध्ये नवा विजेता कोण ठरणार, याकडे सर्व क्रिकेटप्रेमींचे लक्ष लागले आहे.
