‘हाफ पँट’वर क्रिकेट, नको रे बाबा! पत्रकाराने विचारलेल्या प्रश्नावर चहलचे मजेशीर प्रत्युत्तर

भारतीय संघाचा अनुभवी फिरकी गोलंदाज युझवेंद्र चहलने वेस्ट इंडीजविरुद्धच्या पहिल्या एकदिवसीय सामन्यात चांगले प्रदर्शन केले. उभय संघातील एकदिवसीय मलिकेचा पहिला सामना शुक्रवारी (२२ जुलै) त्रिनिदादमध्ये खेळला गेला. भारतीय संघाने ३ धावा शिल्लक ठेवून या सामन्यात विजय मिळवला. सामना संपल्यानंतर चहलला वाढत्या तापमानामुळे ‘शॉर्ट्स’वर क्रिकेट खेळण्याविषयी प्रश्न विचारला गेला. या प्रश्नावर चहलने एक स्पष्ट आणि मजेशीर उत्तर दिले. 

वेस्ट इंडीज आणि भारत यांच्यातील पहिल्या सामन्यात युझवेंद्र चहल (Yuzvendra Chahal) याने दोन विकेट्स घेतल्या. त्याने सामन्यात एकूण १० षटके गोलंदाजी केली आणि यादरम्यान ५८ धावा खर्च केल्या. सामना संपल्यानंतर चहलला प्रश्न विचारला गेला की, वाढते तापमान पाहता क्रिकेट ‘ट्राउजर’ ऐवजी ‘हाफ पॅन्ट्स’मध्ये खेळले पाहिजे का?, यावर प्रत्युत्तर देताना चहलने साफ नकार दिला.

चहल म्हणाला की, “नाही, नाही, मला असे वाटत नाही. कारण जेव्हा कधी तुम्ही मैदानावर घसरता, तेव्हा तुम्हाला स्वतःच्या गुडघ्यांवर घसरावे लागते. हे खूप कठीण असते. माझे दोन्ही गुडघ्यांना दुखापत झाली आहे, तिथे अनेक जखमा आहेत. मला वाटते ‘फुल पॅन्ट’ आमच्यासाठी चांगले काम करत आहे.”