आयपीएलचा हंगाम संपला असला तरी सरफराज खानची आक्रमक फलंदाजी सुरूच आहे. आयपीएलमध्ये पुरेशी संधी न मिळाल्यानंतर, तो सध्या मुंबई टी20 लीगमध्ये उत्कृष्ट कामगिरी करत आहे. विशेष म्हणजे, या स्पर्धेत तो एका नवीन भूमिकेत म्हणजेच सलामीवीर म्हणून मैदानावर उतरला आहे.
शुक्रवारी 5 जून, मुंबई टी20 लीगचा दहावा सामना ‘आकाश टायगर्स एमडब्ल्यूएस’ (Aakash Tigers MWS) आणि ‘नॉर्थ मुंबई पँथर्स’ यांच्यात झाला. या सामन्यात सरफराज खानने अवघ्या 17 चेंडूंत अर्धशतक झळकावले आणि स्पर्धेतील सर्वात जलद अर्धशतकाच्या विक्रमाशी बरोबरी केली. त्याने 21 चेंडूंत 62 धावांची वादळी खेळी केली, ज्यामध्ये 8 चौकार आणि 4 षटकारांचा समावेश होता. या खेळीदरम्यान त्याचा स्ट्राईक रेट 295.24 होता.
नाणेफेक गमावल्यानंतर प्रथम फलंदाजी करताना, नॉर्थ मुंबई पँथर्सने 20 षटकांत 6 बाद 194 धावा केल्या. ज्यामध्ये आयुष वर्तकने 41 चेंडूंत 3 चौकार आणि 7 षटकारांच्या मदतीने 83 धावांची धडाकेबाज नाबाद खेळी केली.
एका टप्प्यावर संघाची अवस्था 4 बाद 87 धावा अशी बिकट झाली होती. मात्र, पाचव्या क्रमांकावर फलंदाजीला आलेल्या वर्तकने जबाबदारी स्वीकारली आणि संघाला एका भक्कम धावसंख्येपर्यंत पोहोचवले.
195 धावांच्या आव्हानाचा पाठलाग करताना, सरफराज खानने आकाश टायगर्स एमडब्ल्यूएसला वादळी सुरुवात करून दिली. डावाच्या पहिल्याच चेंडूवर षटकार मारून त्याने आपले इरादे स्पष्ट केले.
त्यानंतर सरफराजने नॉर्थ मुंबईच्या गोलंदाजांवर आक्रमक हल्ला चढवला. त्याने अवघ्या 17 चेंडूंत आपले अर्धशतक पूर्ण केले. मुंबई टी-20 लीगच्या इतिहासातील हे संयुक्तरीत्या सर्वात जलद अर्धशतक ठरले. मात्र, पॉवरप्लेमध्येच त्याची खेळी संपुष्टात आली. त्याने 21 चेंडूंत 61 धावांची स्फोटक खेळी केली. तो बाद झाल्यानंतर, आकाश टायगर्सला विजयासाठी 14 षटकांत 118 धावांची गरज होती. संघाला विजय मिळवता आला नाही.
सरफराज बाद झाल्यानंतर ‘आकाश टायगर्स’चा डाव कोलमडला. त्यानंतरच्या कोणत्याही फलंदाजाला मोठी खेळी करता आली नाही. परिणामी, ‘आकाश टायगर्स’ला 20 षटकांत 9 बाद 172 धावांपर्यंतच मजल मारता आली.
‘नॉर्थ मुंबई पँथर्स’ने हा सामना 22 धावांनी जिंकत स्पर्धेत एक महत्त्वपूर्ण विजय नोंदवला. सरफराज खानने धडाकेबाज अर्धशतक झळकावूनही, त्याच्या संघाला विजय मिळवता आला नाही.
