धक्कादायक! भारताचे सहा क्रिकेटर कोरोना पॉझिटीव्ह, स्वतः प्रशिक्षकांवर खेळाडूंना पाणी पाजण्याची आली वेळ

सध्या वेस्ट इंडीजमध्ये १९ वर्षाखालील विश्वचषक खेळला जात आहे. विश्वचषकात सहभागी झालेल्या भारतच्या १९ वर्षाखालील संघाच्या आडचणी वाढल्या आहेत. भारतीय संघाने बुधवारी(१९ जानेवारी) आयर्लंडविरुद्ध त्यांचा दुसरा सामना खेळला. या सामन्यात भारतीय कर्णधार यश धूल (Yash Dhull) आणि उपकर्णधार एसके रशीद सहभागी झाले नाहीत. या दोघांना कोरोनाची लागण झाल्यामुळे ते विलगीकरणात आहेत. विश्वचषक स्पर्धेदरम्यान खेळाडूंना कोरोनाची लागण झाल्यामुळे भारतीय संघाला मोठा झटका लागला आहे. यश धूलच्या अनुपस्थितीत निशांत सिंधूने या सामन्यात भारताचे नेतृत्व केले.

क्रिकबजने दिलेल्या माहितीनुसार संघातील जवळपास सहा खेळाडूंना कोरोनाची लागण झाली आहे. याच कारणास्तव मैदानावरील खेळाडूंना पाणी पाजण्यासाठी स्वतः प्रशिक्षकांनी जबाबदारी घेतली. यश धूल आणि रशीद खान यांच्याव्यतिरिक्त मानव पारख, सिद्धार्थ यादव, आराध्य यादव आणि वासु वत्स यांना देखील विलगीकरणात ठेवले गेले आहे. त्यामुळे भारतीय संघाची परिस्थिती अधिक कठीण झाली आहे.

सामन्यात खेळवण्यासाठी प्लेइंग इलेव्हनला देखील खेळाडून असेबसे गोळा केले गेले. आयसीसीने विश्वचषकात १७ खेळाडूंना सहभागी करण्यासाठी परवानगी दिली होती, त्यामुळे प्लेइंग इलेव्हन पूर्ण होऊ शकली.