जगप्रसिद्ध इंडियन प्रीमियर लीग (आयपीएल)मधील सामने पाहण्याची मजा वेगळीच असते. वेगवेगळ्या देशातील एकापेक्षा एक खेळाडू आयपीएलमध्ये सहभागी होतात. त्यामुळे आयपीएलमध्ये कट्टर स्पर्धा पाहायला मिळते. केवळ २० षटकांत पूर्ण डाव संपतो म्हणून फलंदाज ताबडतोब फलंदाजी करतात. तर फलंदाजांना जास्तीत जास्त धावा करण्यापासून रोखत गोलंदाज अधिकाधिक विकेट्स आपल्या नावावर करण्याचा प्रयत्न करतात.
तसं तर, आयपीएलमध्ये चौकार-षटकारांचा वर्षाव होताना दिसतो. पण, वेगाने धावा करण्याच्या प्रयत्नात असणारे फलंदाज बऱ्याचदा त्यांच्या घाईमुळे विकेट्स गमावून बसतात. त्यामुळे अधिकतर फलंदाजांना आयपीएलमध्ये जास्त शतके करता आली नाहीत. आयपीएलमध्ये ख्रिस गेल हा एकमेव फलंदाज आहे, ज्याने सर्वाधिक ६ शतके ठोकली आहेत.
आपणा सर्वांना हे माहिती आहे की, दरवर्षी आयपीएलमध्ये खेळाडूंचा लिलाल होतो आणि वेगवेगळे फ्रंचायझी वेगवेगळ्या संघातील खेळाडूंना जास्तीत जास्त बोली लावत आपल्या संघात सामाविष्ट करु घेतात. त्यामुळे बरेचसे खेळाडू असे आहेत, जे आयपीएलमध्ये २ किंवा त्यापेक्षा जास्त संघांचा भाग राहिले आहेत. तर, काही खेळाडू असेही आहेत, ज्यांनी आयपीएलमध्ये पदार्पण केल्यापासून केवळ एका संघाचेच प्रतिनिधित्त्व केले आहे.
या लेखात, अशा ५ फलंदाजांची माहिती देण्यात आली आहे, ज्यांनी आयपीएलच्या २ वेगवेगळ्या संघांकडून खेळताना शतक ठोकण्याचा पराक्रम केला आहे.
पाच फलंदाज ज्यांनी दोन वेगवेगळ्या आयपीएल फ्रंचायझींकडून केलेत शतक (5 Batsman Who Hit Century From 2 Different Franchise) –
ख्रिस गेल –
२००८ला कोलकाता नाईट रायडर्सकडून आयपीएलमध्ये पदार्पण करणारा वेस्ट इंडिज संघाचा विस्फोटक फलंदाज ख्रिस गेल हा आतापर्यंत ३ वेगवेगळ्या संघांकडून खेळला आहे. ते तीन संघ म्हणजे कोलकाता नाईट रायडर्स, रॉयल चॅलेंजर्स बेंगलोर आणि किंग्स इलेव्हन पंजाब.
युनिव्हर्सल बॉस ख्रिस गेलने आयपीएलमध्ये अनेक विक्रम आपल्या नावावर केले आहेत. यामध्ये आयपीएलच्या २ वेगवेगळ्या संघांकडून शतक करण्याच्या विक्रमाचाही समावेश आहे. गेलने त्याच्या आयपीएल कारकिर्दीत एकूण ६ शतके केली आहेत. यातील ५ शतके त्याने आरसीबीकडून खेळताना केली आहेत. तर, उर्वरित एक शतक त्याने किंग्स इलेव्हन पंजाबकडून खेळताना केले आहे.
विस्तारमध्ये पाहायचे झाले तर, गेलने आरसीबीकडून खेळताना त्याच्या आयपीएल कारकिर्दीतील पहिले शतक केले होते. त्याने हा कारनामा २०११ला केकेआरविरुद्ध केला होता. त्याच हंगामात त्याने पंजाबविरुद्ध दूसरे शतक केले. तर, २०१२ला दिल्ली कॅपिटल्सविरुद्ध, २०१३ला पुणे वॉरियर्सविरुद्ध आणि २०१५ला पंजाबविरुद्ध प्रत्येकी एक-एक शतक केले. तर, २०१८ला पंजाबकडून खेळताना गेलने त्याचे आयपीएलमधील सहावे शतक केले.
डेव्हिड वॉर्नर –
आतापर्यंत आयपीएलमध्ये तीन वेळा ऑरेंज कॅप (सर्वाधिक धावांसाठी) आपल्या नावावर करणाऱ्या डेव्हिड वॉर्नरने आयपीएलच्या २ वेगवेगळ्या संघांकडून शतक ठोकण्याचा विक्रम केला आहे. आक्रमक फलंदाज वॉर्नरने आयपीएलमध्ये एकूण ४ शतके केली आहेत. तो आयपीएलमध्ये आतापर्यंत केवळ २ संघांचा भाग राहिला आहे. हे संघ म्हणजे, दिल्ली कॅपिटल्स आणि सनराइजर्स हैद्राबाद. वॉर्नरने या दोन्ही संघांकडून प्रत्येकी २-२ शतके ठोकली आहेत.
हैद्राबाद संघाचा कर्णधार वॉर्नरने दिल्ली संघाकडून खेळताना त्याचे आयपीएलमधील पहिले शतक केले होते. २०१० साली केकेआरविरुद्ध त्याने हा कारनामा केला होता. तर, २०१२ला डेक्कन चार्जर्सविरुद्ध दूसरे शतक केले होते. हैद्राबाद संघाकडून खेळताना २०१७साली केकेआरविरुद्ध वॉ़र्नरने तिसरे शतक केले होते. तर, २०१९मध्ये आरसीबीविरुद्ध त्याने चौथे शतक केले होते.
शेन वॉटसन –
ऑस्ट्रेलियाचा माजी अष्टपैलू क्रिकेटपटू शेन वॉटसन हा आतापर्यंत आयपीएलच्या ३ संघांचा भाग राहिला आहे. हे तीन संघ म्हणजे, राजस्थान रॉयल्स, रॉयल चॅलेंजर्स बेंगलोर आणि चेन्नई सुपर किंग्स. वॉटसनने त्याच्या आयपीएल कारकिर्दीत एकूण ४ शतके केली आहेत. त्यातील २ शतके त्याने राजस्थान आणि २ शतके चेन्नईकडून लगावली आहेत.
वॉटसनने त्याच्या कारकिर्दीतील पहिले आणि दूसरे शतक राजस्थानकडून केले होते. २०१३मध्ये चेन्नईविरुद्ध पहिले शतक आणि २०१५मध्ये कोलकाता नाईट रायडर्सविरुद्ध दूसरे शतक ठोकले होते. तर, २०१८मध्ये चेन्नई संघात सामाविष्ट झाला. त्याच हंगामात वॉटसनने राजस्थानविरुद्ध तिसरे आणि सनराइजर्स हैद्राबाद विरुद्ध चौथे शतक ठोकण्याचा कारनामा केला. त्यामुळे वॉटसनचेही त्या खेळाडूंच्या यादीत नाव येते, ज्यांनी आयपीएलच्या २ वेगवेगळ्या संघांकडून शतक केले आहे.
संजू सॅमसन –
भारताचा यष्टीरक्षक फलंदाज संजू सॅमसनने आयपीएलच्या दोन वेगवेगळ्या संघांकडून शतक करण्याचा पराक्रम केला आहे. संजू सध्या राजस्थान रॉयल्स संघाचा भाग आहे. त्यापुर्वी तो कोलकाता नाईट रायडर्स आणि दिल्ली कॅपिटल्स संघांकडून खेळला आहे. संजूने त्याच्या आयपीएल कारकिर्दीत फक्त २ शतके ठोकली आहेत.
२०१३साली राजस्थान रॉयल्सकडून संजूने आयपीएलमध्ये पदार्पण केले होते. पण त्याने आयपीएल कारकिर्दीतील पहिले शतक २०१७ला दिल्ली कॅपिटल्सकडून खेळताना रायजिंग पुणे सुपरजायंट्सविरुद्ध केले होते. तर, दूसरे शतक करण्यासाठी त्याला दोन वर्षे वाट पाहावी लागली. अखेर २०१९मध्ये राजस्थान संघाचा भाग असताना संजूने सनराइजर्स हैद्रबादविरुद्ध कारकिर्दीतील दूसरे शतक ठोकले.
एबी डिविलियर्स –
ऑस्ट्रेलियाचा यष्टीरक्षक फलंदाज एबी डिविलियर्स हा २००८ पासून आयपीएलमध्ये खेळत आहे. त्याने दिल्ली कॅपिटल्सकडून त्याचे आयपीएल पदार्पण केले होते. पुढे तो २०१०पर्यंत दिल्ली संघाचा भाग होता. दरम्यान २००९मध्ये चेन्नई सुपर किंग्सविरुद्धच्या एका सामन्यात डिविलियर्सने त्याच्या आयपीएल कारकिर्दीतील पहिले शतक ठोकले होते.
आयपीएल २०११ला डिविलियर्स विराट कोहलीच्या रॉयल चॅलेंजर्स बेंगलोर संघात सामाविष्ट झाला. तेव्हापासून तो आरसीबीकडूनच खेळत आहे. डिविलियर्सने त्याच्या आयपीएल कारकिर्दीतील उर्वरित २ शतकेही आरसीबीकडून खेळतानाच लगावली आहेत. एक २०१५ला मुंबई इंडियन्सविरुद्ध आणि दूसरे २०१६ला गुजरात लायन्सविरुद्ध.
त्यामुळे डिविलियर्सचे नाव त्या निवडक फलंदाजांच्या यादीत येते, ज्यांनी आयपीएलच्या २ वेगवेगळ्या संघांकडून खेळताना शतक केले आहे.