चेन्नई। शुक्रवारपासून(५ फेब्रुवारी) एमए चिदंबरम स्टेडियमवर (चेपॉक स्टेडियम) भारत विरुद्ध इंग्लंड संघात ४ सामन्यांच्या कसोटी मालिकेतील पहिला सामना सुरु आहे. या सामन्याच्या पहिल्याच डावात इंग्लंडचा कर्णधार जो रुटने द्विशतकी धमाका केला आहे. याबरोबरच त्याने एक खास विक्रमही केला आहे.
रुटचे हे कसोटी कारकिर्दीतील ५ वे द्विशतक आहे, तर कसोटी कर्णधार म्हणून तिसरे द्विशतक आहे. त्यामुळे तो कसोटी क्रिकेटमध्ये कर्णधार म्हणून ३ द्विशतके करणारा पहिलाच इंग्लंडचा क्रिकेटपटू ठरला आहे.
आत्तापर्यंत इंग्लंडचे कसोटीत नेतृत्व करताना ८ क्रिकेटपटूंना २०० किंवा त्यापेक्षा अधिक धावांची खेळी करता आली आहे. पण त्यातील ७ जणांनी केवळ एकदाच असा कारनामा केला आहे. तर रुटने तीनवेळा द्विशतकी खेळी कर्णधार म्हणून करुन दाखवली आहे.
त्याने कर्णधार म्हणून याआधी मागील महिन्यातच श्रीलंकेविरुद्ध २२८ धावांची खेळी केली होती. तसेच साल २०१९ मध्ये त्याने हेमिल्टन येथे न्यूझीलंडविरुद्ध २२६ धावा केल्या होत्या.
कारकिर्दीतील १०० व्या कसोटीत द्विशतक –
जो रुटचा भारताविरुद्ध सुरु असलेला चेन्नईतील कसोटी सामना कारकिर्दीतील १०० वा कसोटी सामना आहे. त्यामुळे कारकिर्दीतील १०० व्या कसोटीत द्विशतक करणारा तो जगातील पहिलाच क्रिकेटपटू बनला आहे.
षटकारासह द्विशतक –
जो रुटने भारताविरुद्ध पहिल्या डावात १४३ व्या षटकात आर अश्विनच्या चेंडूवर षटकार मारत द्विशतक पूर्ण केले. त्यामुळे तो कसोटी क्रिकेटमध्ये षटकारासह द्विशतक पूर्ण करणारा इंग्लंडचा पहिलाच फलंदाज ठरला आहे. त्याने त्याच्या द्विशतक पूर्ण करण्यासाठी ३४१ चेंडू खेळले. यात त्याने १९ चौकार आणि २ षटकार मारले.
कर्णधार म्हणून सर्वाधिकवेळा २०० किंवा त्यापेक्षा अधिक धावांची खेळी करणारे इंग्लंडचे क्रिकेटपटू –
३ – जो रुट
१- ऍलिस्टर कूक, ग्रॅहम गुच, टेड डेक्सटर, डेविड गॉवर, वॅली हॅमंड, लिओनार्ड हटन, पीटर मे
महत्त्वाच्या बातम्या –
लय भारी! १०० व्या कसोटीत ‘असा’ पराक्रम करणारा जो रुट जगातील पहिलाच क्रिकेटपटू
एक नंबर भावा..! गगनचुंबी षटकारासह द्विशतक साजरं करत रुटने केला ‘हा’ खास रेकॉर्ड
INDvsENG: सलग तीन कसोटीत जो रुटची दीडशतकी खेळी, दिग्गजांच्या मांदियाळीत केला प्रवेश