टी20 वर्ल्ड कप 2026 मधील भारत विरुद्ध पाकिस्तान या बहुचर्चित सामन्यावर सध्या अनिश्चिततेचे सावट आहे. पाकिस्तानकडून हट्टी भूमिका कायम असताना, या संदर्भात आयसीसीने अद्याप कोणतीही अधिकृत माहिती दिलेली नाही. मात्र, जाहीर करण्यात आलेल्या प्राथमिक वेळापत्रकानुसार 15 फेब्रुवारी रोजी भारत–पाकिस्तान सामना प्रस्तावित आहे.
हा टी20 वर्ल्ड कप भारत आणि श्रीलंका यांच्या संयुक्त यजमानपदाखाली खेळवला जात आहे. टीम इंडिया एक सामना वगळता उर्वरित सर्व सामने भारतात खेळणार आहे, तर पाकिस्तानला आपले सर्व सामने श्रीलंकेत खेळावे लागणार आहेत. पाकिस्तानचा संघ आधीच श्रीलंकेत दाखल झाला आहे. पाकिस्तानने सामना खेळणार नसल्याचे संकेत दिले असले, तरीही नियोजित वेळापत्रकानुसार टीम इंडिया 15 फेब्रुवारीपूर्वी श्रीलंकेत जाणार आहे. सामना झाला नाही, तर भारतीय संघ आपली जबाबदारी पार पाडून पुढील दिवशी भारतात परतणार आहे.
1992 पासून सुरू झाली भारत–पाकिस्तान विश्वचषकातील लढत
आयसीसीने पहिला विश्वचषक 1975 मध्ये आयोजित केला होता. मात्र, सुरुवातीच्या काही स्पर्धांमध्ये भारत आणि पाकिस्तान यांच्यात सामना झाला नव्हता. 1992 च्या विश्वचषकात प्रथमच भारत–पाकिस्तान सामना खेळवण्यात आला आणि त्यानंतर जवळपास प्रत्येक विश्वचषकात हा सामना सर्वाधिक चर्चेचा ठरला. अंतिम फेरीपेक्षाही जास्त प्रेक्षक भारत–पाकिस्तान सामन्याकडे डोळे लावून बसलेले असतात. मात्र, यंदा हा थरार पाहायला मिळेल की नाही, याबाबत शंका आहे.
34 वर्षांचा इतिहास : भारताचे वर्चस्व
1992 पासून आतापर्यंत आयसीसीने एकूण 27 मोठ्या स्पर्धा आयोजित केल्या आहेत. यात वनडे विश्वचषक, टी20 विश्वचषक आणि चॅम्पियन्स ट्रॉफीचा समावेश आहे. या कालावधीत भारत आणि पाकिस्तान यांच्यात आयसीसी स्पर्धांमध्ये एकूण 22 सामने खेळवले गेले. यापैकी 18 सामने भारताने जिंकले असून पाकिस्तानला केवळ 4 वेळाच विजय मिळवता आला आहे.
1992 च्या विश्वचषकात पाकिस्तान विश्वविजेता ठरला होता, मात्र त्या स्पर्धेतही भारताकडून त्यांना पराभव पत्करावा लागला होता. विशेष म्हणजे, वनडे विश्वचषकाच्या इतिहासात आजपर्यंत पाकिस्तानने भारताला कधीही हरवलेले नाही.
भारताला आयसीसी स्पर्धांमध्ये पाकिस्तानकडून मिळालेला सर्वात मोठा धक्का 2021 च्या टी20 विश्वचषकात बसला. त्या सामन्यात पाकिस्तानने भारताचा 10 विकेट्सने पराभव केला होता. टी20 आणि वनडे विश्वचषकात भारताचा पाकिस्तानविरुद्ध हा एकमेव पराभव आहे.
चॅम्पियन्स ट्रॉफीत पाकिस्तान वरचढ
पाकिस्तानच्या उर्वरित तीन विजय चॅम्पियन्स ट्रॉफीत आले आहेत.
– 2004 मध्ये पाकिस्तानने भारतावर 3 विकेट्सने विजय मिळवला.
– 2009 मध्ये पाकिस्तानने 54 धावांनी भारताचा पराभव केला.
– 2017 च्या अंतिम सामन्यात पाकिस्तानने भारतावर तब्बल 180 धावांनी मात करत विजेतेपद पटकावले.
हीच चार सामने असे आहेत, जिथे पाकिस्तानने भारतावर आयसीसी स्पर्धांमध्ये विजय मिळवला आहे.
भारत आणि पाकिस्तान सध्या फक्त आयसीसी स्पर्धा आणि आशिया कपमध्येच आमनेसामने येतात. 2023 च्या चॅम्पियन्स ट्रॉफीत भारताने पाकिस्तानचा 6 विकेट्सने पराभव केला होता. त्यानंतर आशिया कप 2025 मध्ये दोन्ही संघांमध्ये तीन सामने खेळवले गेले आणि तिन्ही सामने भारताने जिंकले. अंतिम सामन्यातही भारताने पाकिस्तानला पराभूत करत जेतेपद पटकावले.
आता सगळ्यांचे लक्ष 15 फेब्रुवारीकडे लागले आहे. हा महामुकाबला होणार की नाही, याचा निर्णय लवकरच होईल. चाहत्यांना पुन्हा एकदा भारत–पाकिस्तान संघर्ष पाहायला मिळणार की नाही, हे पाहणे उत्सुकतेचे ठरणार आहे.
