आगामी टी20 विश्वचषकापूर्वी, भारतीय संघाने न्यूझीलंडविरुद्ध पाच सामन्यांची टी-20 मालिका 4-1 अशी जिंकून आपल्या तयारीची एक अग्निपरीक्षा दिली आहे. या मेगा इव्हेंटपूर्वी काही खेळाडूंच्या कामगिरीमुळे ही मालिका टीम इंडियासाठी महत्त्वाची होती, ज्यात कर्णधार सूर्यकुमार यादवचा समावेश होता. या पाच सामन्यांच्या मालिकेतील सूर्यकुमार यादवच्या फलंदाजीतील कौशल्याने टी-20 विश्वचषकापूर्वी इतर सर्व संघांसाठी धोक्याची घंटा वाजवली आहे. सूर्याने न्यूझीलंडविरुद्धच्या टी-20 मालिकेत 200 हून अधिक धावा केल्या. तिरुवनंतपुरम येथे खेळल्या गेलेल्या अंतिम सामन्यात 60 धावांच्या खेळीने त्याने टी20 आंतरराष्ट्रीय सामन्यांमध्ये एक मोठा विश्वविक्रमही प्रस्थापित केला.
गेल्या वर्षभरापासून त्याच्या फॉर्मशी झुंजत असलेला भारतीय कर्णधार सूर्यकुमार यादव न्यूझीलंडविरुद्धच्या टी20 मालिकेत पुन्हा फॉर्ममध्ये आला. सूर्याने कालच्या सामन्यात 63 धावांच्या खेळीदरम्यान टी20 आंतरराष्ट्रीय सामन्यांमध्ये 3000 धावा पूर्ण केल्या. यासह, सूर्यकुमार यादव हा जागतिक क्रिकेटमधील सर्वात जलद खेळाडू ठरला ज्याने कमीत कमी चेंडूंमध्ये हा टप्पा गाठला. सूर्यकुमार यादवने फक्त 1822 चेंडूंमध्ये टी-20 आंतरराष्ट्रीय सामन्यांमध्ये 3000 धावा पूर्ण केल्या, तर यापूर्वी हा विक्रम यूएईच्या मोहम्मद वसीमच्या नावावर होता, ज्याने 1947 चेंडूंमध्ये टी-20 आंतरराष्ट्रीय सामन्यांमध्ये 3000 धावा पूर्ण केल्या.
आंतरराष्ट्रीय टी-20 सामन्यांमध्ये कमी चेंडूंमध्ये 3000 धावा पूर्ण करणारे खेळाडू
सूर्यकुमार यादव (भारत) – 1822 चेंडू
मोहम्मद वसीम (यूएई) – 1947 चेंडू
जोस बटलर (इंग्लंड) – 2068 चेंडू
आरोन फिंच (ऑस्ट्रेलिया) – 2077 चेंडू
डेव्हिड वॉर्नर (ऑस्ट्रेलिया) – 2113 चेंडू
रोहित शर्मा (भारत) – 2149 चेंडू
विराट कोहली (भारत) – 2169 चेंडू
न्यूझीलंडविरुद्धच्या या पाच सामन्यांच्या टी20 मालिकेत, सूर्यकुमार यादवला पाचही डावांमध्ये फलंदाजी करण्याची संधी मिळाली, त्याने 80.67 च्या सरासरीने एकूण 242 धावा केल्या. या दरम्यान, त्याने तीन अर्धशतके झळकावली आणि दोनदा नाबाद राहिला. या मालिकेत सूर्यकुमार यादवचा स्ट्राइक रेट 200च्या आसपास होता.
