इंडियन प्रीमियर लीग (आयपीएल 2020) 19 सप्टेंबरपासून सुरू होणार आहे. यावर्षी ही स्पर्धा कोरोना विषाणूमुळे भारताऐवजी युएईमध्ये खेळली जात आहे. लीगचा सलामीचा सामना गतविजेत्या मुंबई इंडियन्स आणि चेन्नई सुपर किंग्ज (सीएसके) यांच्यात होणार आहे.
आयपीएलच्या या हंगामात सर्वांची नजर चेन्नई सुपर किंग्जचा कर्णधार एमएस धोनीवर आहे. 15 ऑगस्ट रोजी धोनी आंतरराष्ट्रीय क्रिकेटमधून निवृत्त झाला होता. तो गेल्या 14 महिन्यांपासून कोणताही क्रिकेट सामना खेळलेला नाही. त्याची एक झलक पाहण्यासाठी त्याचे चाहते आतुर झालेले आहेत. अशा परिस्थितीत ऑस्ट्रेलियाचे माजी क्रिकेटपटू डीन जोन्स यांनी कर्णधार धोनीचे कौतुक केले आहे. ते स्टार्स स्पोर्ट्सचा कार्यक्रम ‘क्रिकेट कनेक्टेड’ मध्ये बोलत होते.
ते म्हणाले, “एमएस धोनी एक उत्तम कर्णधार आहे. मात्र, गेल्या 14 महिन्यांपासून तो क्रिकेट खेळलेला नाही. क्वारंटाईनमध्ये राहून तो तरूण क्रिकेटपटूंना शिस्त शिकवत आहे कारण या खेळात शिस्तीची नितांत आवश्यकता आहे. धोनी माझ्यासाठी नेहमीच जगातील पाच सर्वोत्कृष्ट क्रिकेटपटूंच्या यादीमध्ये राहील, कारण त्याने काही वर्ष अतिशय उत्तम पद्धतीने भारतीय संघाचे नेतृत्व केले आहे. तसे करणे सोपे नाही. विरोधी संघाकडून चूक होण्याची तो वाट पाहतो, त्यानंतर तो सामन्यावर मजबूत पकड बनवतो.”
सीएसकेचा फलंदाज सुरेश रैना संघासह संयुक्त अरब अमिरात (युएई) येथे दाखल झाला होता, परंतु वैयक्तिक कारणामुळे तो दुबईहून मायदेशी परतला.
“रैनाची अनुपस्थिती ही सीएसकेसाठी चिंताजनक बाब आहे, आयपीएलमध्ये सर्वाधिक धावा करणाऱ्या पहिल्या 5 खेळाडूंमध्ये तो आहे. तो डाव्या हाताने फलंदाजी करतो आणि फिरकी गोलंदाजीही करतो. सीएसकेकडे जास्तीत जास्त उजव्या हाताचे खेळाडू आहेत आणि अशा परिस्थितीत त्यांना रैनासारख्या डाव्या हाताच्या अनुभवी फलंदाजाची कमी जाणवेल.” असेही पुढे बोलतांना डीन जोन्स म्हणाले