भारत आणि इंग्लंड यांच्यात (India vs England T20 2026) खेळला गेलेला पहिला टी-20 सामना पावसामुळे रद्द करण्यात आला. टीम इंडियाचा डाव सुरू असतानाच हलका पाऊस पडत होता. (IND vs ENG rain match) मात्र भारताचा डाव संपल्यानंतर पावसाचा जोर वाढल्याने सामना पुन्हा सुरू होऊ शकला नाही. सामन्यासाठी 45 मिनिटांचा कट-ऑफ वेळ होता, मात्र मैदान खेळण्यायोग्य करण्यासाठी तो पुरेसा ठरला नाही. त्यामुळे अखेर सामना रद्द करण्यात आला. (IND vs ENG 1st T20 abandoned) भारताने उभारलेले आव्हानात्मक लक्ष्य पाहता सामना पूर्ण झाला असता, तर चुरशीची लढत पाहायला मिळाली असती.
प्रथम फलंदाजी करताना भारतीय संघाने 20 षटकांत 7 बाद 189 धावा केल्या. अभिषेक शर्मा (Abhishek Sharma) आणि कर्णधार श्रेयस अय्यर (Shreyas Iyer) यांनी दमदार अर्धशतके झळकावली, तर शिवम दुबेने नाबाद 42 धावांची महत्त्वपूर्ण खेळी केली. इंग्लंडकडून साकिब महमूदने 3 विकेट्स घेतल्या. मात्र मुसळधार पावसामुळे इंग्लंडचा डाव सुरूच होऊ शकला नाही.
नाणेफेक जिंकून भारतीय संघाने प्रथम फलंदाजीचा निर्णय घेतला. मात्र सुरुवात निराशाजनक झाली. दुसऱ्याच षटकात संजू सॅमसन (Sanju Samson) आणि ईशान किशन (Ishan Kishan) यांच्या रूपाने भारताला दोन मोठे धक्के बसले. ईशान किशन सलग दुसऱ्या सामन्यात धावबाद झाला.
यानंतर अभिषेक शर्मा आणि श्रेयस अय्यर यांनी डाव सावरत तिसऱ्या विकेटसाठी 82 धावांची भागीदारी केली. अभिषेकने अवघ्या 24 चेंडूत 59 धावांची स्फोटक खेळी केली, तर श्रेयस अय्यरने 66 धावांचे मोलाचे योगदान दिले. शेवटच्या षटकांमध्ये शिवम दुबेने नाबाद 42 धावांची झंझावाती खेळी करत भारताला 189 धावांपर्यंत मजल मारून दिली.
इंग्लंडकडून साकिब महमूदने 3 विकेट्स घेतल्या, तर आदिल रशीद आणि सॅम करन यांनी प्रत्येकी एक विकेट मिळवली.
या सामन्यात युवा फलंदाज वैभव सूर्यवंशीला पदार्पणाची संधी मिळण्याची शक्यता व्यक्त केली जात होती. मात्र त्याला अंतिम अकरामध्ये स्थान मिळाले नाही. त्यामुळे त्याच्या आंतरराष्ट्रीय पदार्पणासाठी चाहत्यांना आणखी प्रतीक्षा करावी लागणार आहे.
मालिकेतील दुसरा सामना 4 जुलै रोजी मँचेस्टर येथे (IND vs ENG 2nd T20) खेळवला जाणार आहे. हा सामना भारतीय वेळेनुसार सायंकाळी 7 वाजता सुरू होईल, तर नाणेफेक सायंकाळी 6.30 वाजता होणार आहे.
