अन् अचानक वातावरण तापलं! वाद घालण्यासाठी कोहलीची बटलरच्या दिशेने धाव, पाहा पूर्ण प्रकरण

अहमदाबाद येथे शनिवारी (२० मार्च) भारत विरुद्ध इंग्लंड यांच्यात झालेला पाचवा टी२० सामना भारताने ३६ धावांनी जिंकला आणि ३-२ ने मालिका जिंकली. प्रथम फलंदाजी करताना भारताने इंग्लंडपुढे २२४ धावांचे भलेमोठे लक्ष्य उभारले होते. प्रत्युत्तरात इंग्लंड निर्धारित २० षटकात ८ बाद १८८ धावाच करू शकला. दरम्यान भारताचा कर्णधार विराट कोहली आणि इंग्लंडचा सलामीवीर जोस बटलर यांच्यात शाब्दिक बाचाबाची झाल्याचे पाहायला मिळाले.

त्याचे झाले असे की, भारताच्या लक्ष्याचा पाठलाग करताना इंग्लंडचा सलामी फलंदाज जेसन रॉय शून्यावर तंबूत परतला. मात्र त्यानंतर यष्टीरक्षक फलंदाज बटलर आणि डेविड मलान यांनी मैदानावर तळ ठोकला. बाराव्या षटकापर्यंत त्यांच्यात १३० धावांची भागिदारी झाली. मात्र त्यापुढील षटकात भारताचा अनुभवी गोलंदाज भुवनेश्वर कुमारच्या एका चेंडूवर बटलरने हवेत शॉट खेळला. परंतु सीमारेषेजवळ क्षेत्ररक्षणासाठी उभारलेल्या हार्दिक पंड्याने तो झेल सहज पकडला.

अशाप्रकारे ३४ चेंडूत ४ षटकार आणि २ चौकारांच्या मदतीने ५२ धावा केल्यानंतर बटलरला पव्हेलियनला परतावे लागले. त्यामुळे रागात असलेला बटलर मैदानाबाहेर जाताना काहीतरी पुटपुटला. हे पाहून कर्णधार विराट अचानक आक्रमक झाला आणि वाद घालण्यासाठी बटलरच्या दिशेने सुसाट सुटला. त्यानंतर बटलरनेही मागे वळून विराटला प्रत्युत्तर द्यायचे ठरवले. पण त्याने माघार घेतली आणि तो मैदानाबाहेर पडला.

विराट आणि बटलर यांच्यातील या शाब्दिक युद्धाचा व्हिडिओ सोशल मीडियावर वाऱ्यासारखा व्हायरल होत आहे.

https://twitter.com/team_india2_0/status/1373314694354628611?s=20