कुस्तीपटू संगीता फोगाट हिने 140 कोटींहून अधिक भारतीयांची मान अभिमानाने उंचावली. शनिवारी (दि. 15 जुलै) संगीताने बुडापेस्ट येथे आयोजित हंगरी रँकिंग सीरिज स्पर्धेअंतर्गत नॉन-ऑलिम्पिक 59 किलो वजनी गटात कांस्य पदक पटकावले. विशेष म्हणजे, संगीता जंतर-मंतर येथे भारतीय कुस्तीगीर महासंघाचे अध्यक्ष बृजभूषण शरण सिंग यांच्याविरुद्ध आंदोलन करणाऱ्या 6 कुस्तीपटूंपैकी एक होती.
दारुण पराभवाने सुरुवात, नंतर दमदार पुनरागमन
स्पर्धेत संगीता फोगाट (Sangeeta Phogat) हिची सुरुवात दारुण पराभवाने झाली होती. मात्र, तिने दुसऱ्या सामन्यात विजय मिळवून दमदार पुनरागमन केले. ती उपांत्य सामन्यात पराभूत झाली, पण तिने 20 वर्षांखालील जागतिक चॅम्पियनशिप रौप्य पदक विजेती हंगरीची युवा व्हिक्टोरिया बोर्सोस हिच्याविरुद्ध कांस्य प्ले-ऑफमध्ये 6-2ने विजय मिळवला.
फक्त 80 सेंकद चालला सामना
मागील वर्षी 62 किलो वजनी गटात राष्ट्रीय चॅम्पियनशिप जिंकणाऱ्या संगीताने अमेरिकेच्या जेनिफर पेज रॉजर्सविरुद्धच्या पराभवाने सुरुवात केली होती. हा सामना फक्त 80 सेकंद चालला. यामध्ये अमेरिकेच्या कुस्तीपटूने तिला गुण मिळवण्याची संधीच दिली नाही. शेवटी अमेरिकन कुस्तीपटूने संगीताविरुद्ध आघाडी मिळवत विजय साकारला. अमेरिकेच्या ब्रेंडा ऑलिविया रेयनाविरुद्धच्या पुढच्या सामन्यात विजय मिळवण्यात संगीताला यश आले. ब्रेकमध्ये तिने 4-2ने आघाडी घेतली. तसेच, ही आघाडी मजबूत करण्यासाठी शेवटपर्यंत तांत्रिक श्रेष्ठतेच्या आधारावर सामना जिंकला.
दुसऱ्या टप्प्यात संगीताने गमावला नाही एकही गुण
सहा कुस्तीपटूंच्या ड्रॉमध्ये एक विजय आणि एका पराभवाने तिला पोलंडच्या मॅग्डेलेना उर्सजुला ग्लोडेकविरुद्ध उपांत्य सामन्यात पोहोचवले. तिची सुरुवात चांगली राहिली, पण लवकरच ग्लोडेक वरचढ ठरली आणि तिने सामना जिंकला. बोर्सोसविरुद्ध कांस्य प्ले-ऑफ सामन्यात संगीताने टेक-डाऊन मूव्हचा वापर केला. हंगरीच्या खेळाडूने पुनरागमन करत गुण 2-2 असे बरोबरीत केले. मात्र, संगीताने लगेच वेगवान आणि आक्रमक खेळ सुरू केला. बोर्सोस हिने चांगला बचाव केला, पण संगीताने याचे उत्तर देत सामन्यात 4-2ने आघाडी घेतली. दुसऱ्या टप्प्यात संगीताने एकही गुण गमावला नाही. तिने आपल्या खात्यात 2 गुण टाकत कांस्य पदकावर नाव कोरले.
कुणाला समर्पित केले पदक?
संगीताने कांस्य पदक जिंकल्यानंतर ट्वीट केले. तिने लिहिले की, “तुम्हा सर्वांचे शुभेच्छांचे संदेश माझ्यापर्यंत पोहोचत आहेत. यावेळी मी भावूक आहे. तुम्हा सर्वांना खूप खूप धन्यवाद. हे पदक फक्त माझे नाहीये. तुम्हा सर्वांचे आहे. मी हे पदक जगातील त्या सर्व संघर्ष करणाऱ्या महिलांना समर्पित करते, जे महिलांविरुद्ध होत असलेल्या गुन्ह्यांविरुद्ध संघर्ष करतात.”
आप सभी के बधाई के संदेश मुझ तक पहुँच रहे हैं इस पल पर बहुत भावुक हूँ।
आप सभी का बहुत बहुत शुक्रिया। यह मेडल सिर्फ़ मेरा नहीं है। सब आप सभी का मेडल है
मैं इस मेडल को दुनिया की उन सभी संघर्षशील महिलाओं को समर्पित करती हूँ जो महिलाओं के विरुद्ध हुए अपराधों के ख़िलाफ़ संघर्षरत हैं।… pic.twitter.com/FyJnqhaHVZ
— Sangeeta Phogat (@sangeeta_phogat) July 15, 2023
संगीताच्या या ट्वीटवर तिच्यावर शुभेच्छांचा वर्षाव होत असून चाहते तिचे कौतुकही करत आहेत. (wrestler sangeeta phogat won bronze in hungary dedicated medal to struggling women read)
महत्वाच्या बातम्या-
गुरू योगेश्वर दत्त आणि शिष्य बजरंग पुनियाने ठोकले एकमेकांविरुद्ध शड्डू! एशियन गेम्स ट्रायलवरून नवा वाद
Wrestler Protest: पॉक्सो प्रकरणी बृजभूषण यांना क्लीन चिट; सुवर्णपदक विजेत्यांचे आता काय होणार?