जगभरात अनेक क्रिकेटर झाले, परंतु असा विक्रम केवळ रोहितच्याच नावावर

मर्यादित षटकांच्या भारतीय क्रिकेट संघाचा उपकर्णधार रोहित शर्माने त्याच्या १३ वर्षांच्या कारकिर्दीत चाहत्यांसाठी अनेक अविस्मरणीय क्षण दिले आहे. त्याच्या दमदार फटकेबाजीला आज जगभरातील गोलंदाज घाबरतात. त्याला मर्यादित षटकांच्या क्रिकेटचा बादशहा म्हटल्यास वावगे ठरणार नाही.

वनडेत रोहितच्या नावावर अनेक विक्रमांची नोंद आहे. परंतु, त्या सर्व विक्रमांमध्ये एक कमालीचा विक्रमही आहे, ज्याच्याविषयी खूप कमी क्रिकेटप्रेमींना माहिती असेल.

हिटमॅन रोहित हा वनडेत सलग १० वनडे मालिकेत शतक ठोकणारा जगातील एकमेव क्रिकेटपटू आहे. त्याने याची सुरुवात २०१७च्या चॅम्पियन्स ट्रॉफीमध्ये केली होती आणि त्याचा शेवट त्याने २०१९मध्ये ऑस्ट्रेलियामधील वनडे मालिकेत केला.

२०१७-२०१९ यादरम्यान रोहितने ८ वनडे मालिका आणि २ वनडे स्पर्धा खेळल्या. या एकूण १० वनडे मालिका किंवा स्पर्धांमध्ये रोहितने कमीत कमी एक तरी शतक ठोकले आहे. २०१७मध्ये त्याने श्रीलंका, दक्षिण आफ्रिका, ऑस्ट्रेलिया, न्यूझीलंड आणि इंग्लंडविरुद्धच्या वनडे मालिकेतील प्रत्येक मालिकेत एक शतक जडले होते.

त्यानंतर दुबईतील आशिया चषक स्पर्धेत रोहितने वेस्ट इंडिज आणि ऑस्ट्रेलियाविरुद्धच्या वनडे मालिकेत एकदा तरी शतकी खेळी केल्या होत्या. तो एवढा अफलातून विक्रम करणारा जगातील एकमेव फलंदाज आहे. त्याच्यापुर्वी आणि त्याच्यानंतर असा विक्रम आजवर कुणीही केलेला नाही.