मुंबई । आयपीएलचा पहिला चॅम्पियन संघ राजस्थान रॉयल्स मंगळवारी, 22 सप्टेंबर रोजी चेन्नई सुपर किंग्ज विरुद्ध आपला पहिला सामना खेळणार आहे. या सामन्यापूर्वी राजस्थान रॉयल्सला दिलासा देणारी बातमी समोर आली आहे. ऑस्ट्रेलियाचा क्रिकेटपटू आणि राजस्थान रॉयल्सचा कर्णधार स्टीव्ह स्मिथ तंदुरुस्त झाला आहे.
इंग्लंडविरुद्धच्या वनडे मालिकेपूर्वी स्टीव्ह स्मिथच्या डोक्याला दुखापत झाली होती. त्यामुळे तो वनडे मालिकेत खेळू शकला नाही. त्यानंतर स्मिथला कन्कशन टेस्ट द्यावी लागली. त्यातही तो पास झाला. पण खबरदारीचा उपाय म्हणून त्याला वनडे मालिकेत खेळविले नाही. स्मिथ आयपीएलच्या पहिल्या सामन्यात खेळेल की नाही याविषयी प्रश्नचिन्ह उपस्थित होत होते.
इंग्लंडहून दुबईमध्ये आल्यानंतर त्याने काही दिवस आराम केला. त्यानंतर तो जीक जॅक रनिंग करतानाही दिसून आला. आज तो नेटमध्ये सराव करणार असून उद्याच्या सामन्यात खेळणार असल्याची शक्यता वर्तवली जात आहे.
मुंबई इंडियन्सविरुद्धच्या सलामीच्या सामन्यात विजय मिळवून आपल्या मोहिमेची विजयी सुरुवात करणार्या चेन्नई सुपर किंग्जबद्दल स्मिथ म्हणाला की, ‘चेन्नई जिंकण्यासाठी चांगला खेळला आहे. राजस्थान रॉयल्स चांगली कामगिरी करेल.”