आयपीएलच्या तेराव्या हंगामातील चौथा सामना मंगळवारी चेन्नई सुपर किंग्ज विरुद्ध राजस्थान रॉयल्स संघात झाला. या सामन्यात नाणेफेक जिंकत एमएस धोनीने प्रथम क्षेत्ररक्षणाचा निर्णय घेतला. परंतू राजस्थानच्या संजू सॅमसन, स्टिवन स्मिथ व जोफ्रा आर्चरने हा निर्णय अयोग्य ठरवत चेन्नईची चांगलीच धुलाई केली.
राजस्थानने निर्धारित २० षटकांत ७ बाद २१६ धावा करताना चेन्नईच्या जवळपास सर्वच फलंदाजांची चांगलीच धुलाई केली. संजू सॅमसनने ३२ चेंडूत ७४, स्टिवन स्मिथने ४७ चेंडूत ६९ तर जोफ्रा आर्चरने ८ चेंडूत २७ धावा केल्या. या सामन्यात राजस्थानकडून १७ षटकारांची बरसात पहायला मिळाली. विशेष म्हणजे या तीन खेळाडूंनी मिळूनच हे १७ षटकार मारले.
जोफ्रा आर्चरने केल्या २ चेंडूत २७ धावा
या सामन्यात १९ षटकांनंतर राजस्थानची ७ बाद १८६ अशी स्थिती होती. खेळपट्टीवर टॉम करन ९ तर जोफ्रा आर्चर १ धावेवर खेळत होते. त्यानंतर शेवटचे षटक घेऊन चेन्नईकडून लुंगी न्गिडी हा गोलंदाज आला. त्याच्या पहिल्याच चेंडूवर जोफ्रा आर्चरने लॉंग ऑफला षटकार मारला. त्यानंतर दुसऱ्या चेंडूवर जोफ्राने पुन्हा स्केअर लेगवरुन षटकार मारला. त्यानंतर न्गिडीने तिसरा चेंडू नो बॉल टाकला. या चेंडूवर जोफ्राने लॉंग ऑनला षटकार मारला. त्यानंतर पुढचा चेंडूही नो बॉल होता व त्यावरी जोफ्राने लॉंग ऑफला चौथा षटकार मारला. त्यानंतर न्गिडीने एक वाईड चेंडू टाकला. यामुळे ४ षटकारांच्या एकूण २४ धावा, नो बॉलच्या २ धावा व वाईड चेंडूची १ अशा केवळ २ चेंडूंवर तब्बल २७ धावा झाल्या.
ठरले आयपीएलमधील सर्वात महागडे २०वे षटक
आयपीएलमध्ये यापुर्वी अशोक दिंडाने २०१७मध्ये पुण्याकडून खेळताना मुंबईविरुद्ध विसाव्या षटकात ३० धावा दिल्या होत्या. त्यानंतर जॉर्डनने पंजाबकडून खेळताना दिल्लीविरुद्ध विसाव्या षटकात २०२०मध्येच ३० धावा दिल्या. तर आजच्या सामन्यात लुंगी न्गिडीने विसाव्या षटकात ३० धावा दिल्या.
